Çexiya, Brno, 15 may/ Trend , müxbir S.Nəcəfov/ Çexiyanın nüfuzlu Masarik Universitetində "Azərbaycan və Xəzər regionu ölkələrinin öyrənilməsi üzrə Mərkəz" yaradılacaq.
"Mərkəz Xəzər regionunun araşdırılması ilə yanaşı, Azərbaycanda baş verən siyasi, iqtisadi və sosial yeniliklərin Avropaya düzgün çatdırılmasını da qarşısına məqsəd qoyub" - deyə Masarik Universitetinin Politologiya İnstitutunun direktoru Bretislav Donçak Trend -a bildirib.
Onun sözlərinə görə, yeni yaradılacaq Mərkəzə Çexiyada yaşayan azərbaycanlı alim rəhbərlik edəcək, lakin qurum çex, polyak, alman mütəxəssislərindən də yararlanacaq.
"Bu qurumun yaradılması Azərbaycan reallıqlarını və problemlərini, həmçinin inkişafını Avropanın nüfuzlu elmi mərkəzlərinə çatdırmaq üçün böyük şansdır" - deyə Donçak bildirib.
Professor Donçak əlavə edib ki, Azərbaycanla elmi-mədəni əlaqələri genişləndirməkdə maraqlıdır.
O, Azərbaycan Demokratik Respublikasının yaranmasının 90-cı ildönümü ilə əlaqədar ötən gün Masarik Universitetində təşkil olunmuş sərgidə də iştirak edib: "Belə tədbirlər Azərbaycanın tanınması üçün xüsusi əhəmiyyət kəsb edir. Bizimlə birgə çalışan azərbaycanlı həmkarlarımız vasitəsilə də Azərbaycan haqqında məlumatlar əldə etmişik" - deyə çexiyalı alim bildirib.
Müəlliflə əlaqə saxlamaq üçün elektron ünvan - [email protected]
