Azərbaycan, Bakı, 04 iyun/ Trend , müxbir İ.Əlizadə/ Azərbaycan müxalifətini təmsil edən Açıq Cəmiyyət Partiyası (ACP) hesab edir ki, payızda keçiriləcək prezident seçkilərində hakimiyyətin namizədi qalib gələcək. "Azərbaycan müxalifəti dağınıq vəziyyətdədir və qarşıdan gələn prezident seçkilərində hakimiyyətin namizədinin qalib gəlməsi problem olmayacaq", - deyə çərşənbə günü Trend -a açıqlamasında ACP sədrinin müavini Yaqub Abbasov bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Hakim Yeni Azərbaycan Partiyası təşkilatın sədri, prezident İlham Əliyevin namizədliyini irəli sürəcəyini açıqlayıb. Müxalifəti təmsil edən Müsavat Partiyasının başqanı İsa Qəmbər və Ümid Partiyasının sədri İqbal Ağazadə, "Azərbaycan Naminə" İctimai Forumun prezdenti Eldar Namazov, ADP sədri Sərdar Cəlaloğlu və Yaşıllar Partiyasının sədri Mais Güləliyev də prezidentliyə namizədliklərini irəli sürüblər. "Azadlıq" bloku seçkilərə qatılmaqdan imtina edib. ACP mövqeyini dəqiqləşdirməyib.
"Müxalifət bir araya gəlib, ortaya vahid mövqe qoya bilmir. Bu da müxalifətin qalib gəlmək şansını sıfıra endirir", - deyə partiya rəsmisi əlavə edib.
Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. Bu ilin fevralınadək ADP-nin sədri olmuş Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]