Azərbaycan, Bакı, 27 aprel / Trend , müxbir A.Hüseynbala /
Azərbaycanın müxalif partiyalarının təmsil olunduğu ittifaq bələdiyyə seçkilərində siyasi blok kimi iştirak edəcək.
"Bizim bütün müxalifət qüvvələrinin seçkilərdə birgə iştirakı ilə bağlı təklifimiz birmənalı qarşılanmadığından, artıq seçkilərə beş partiyanın blok şəklində qatılması haqda qərar qəbul etmişik", - bazar ertəsi Trend -a Demokratiya Uğrunda İttifaqda (DUİ) təmsil olunan Böyük Azərbaycan Partiyasının (BAP) sədri Elşad Musayev bildirib.
Trend -un arayışı: Azərbaycanda bələdiyyə seçkisi 2009-cu ilin payızında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Musayevin sözlərinə görə, bələdiyyə seçkilərinə hazırlaşmaq üçün ittifaqda təmsil olunan partiyaların liderləri vaxtaşırı Azərbaycanın müxtəlif bölgələrinə səfər edəcəklər. "Bakıda qurumun üzvü olan siyasi təşkilatların əməkdaşlığı ilə bağlı heç bir problem yoxdur. Amma bölgələrdə fəaliyyətimizi birgə koordinasiya etməyə ciddi ehtiyac var", - BAP sədri əlavə edib.
Partiya sədrinin fikrincə, bələdiyyə seçkilərinin keçirilməsi üçün rəsmi kampaniyaya start verilmədiyindən, müxalifətin daha geniş koalisiya yaratması imkanları da tükənməyib. "Biz əvvəlki fikrimizdə qalırıq, seçkilərdə birgə əməkdaşlığın tərəfdarı olan hər bir partiya ilə əməkdaşlığa hazırıq. Düşünürük ki, bələdiyyə seçkilərində müxalifət vahid qüvvə ilə iştirak edə bilərsə, bu, 2010-cu ildə keçiriləcək parlament ceçkiləri üçün yaxşı hazırlıq olacaq", - Musayev vurğulayıb.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassık Xalq Cəbhəsi, Azadlıq və Milli Demokratiya partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur.
Məqalə müəllifi ilə əlaqə ünvanı:[email protected]