Azərbaycan, Bakı, 09 iyul / Trend , müxbir R.Hafizoğlu /
Türkiyənin "SAADET" partiyasının keçmiş millət vəkili, analitik Mehmet Bekaroğlu hesab edir ki, ölkə hakimiyyəti Qəzza hadisələrindəki aktivliyini Çindəki hadisələrdə nümayiş etdirmir.
"Türkiyə hökuməti Qəzza hadisələrində göstərdiyi aktivliyi Çindəki hadisələrdə göstərmir. Ankara rəsmi bəyanatlarla çıxış etsə də, bu, hadisələrin qarşısını almaq üçün kifayət deyil", - Bekaroğlu cümə axşamı Ankaradan telefonla Trend -a bildirib.
Trend -un arayışı: İyilun 6-da Çinin Sinszyan-Uyğur muxtar rayonunda bazar günü başlayan iğtişaşlar nəticəsində ölənlərin sayı 156 nəfərə çatıb. İğtişaşlar bazar günü axşam saatlarında rayonun inzibati mərkəzi olan Urumçi şəhərində başlayıb. Şahidlərin verdiyi açıqlamalara görə, toqquşmalar dükanlar və avtomobillərin yandırılması, qarət halları ilə müşahidə olunub. Yerli hüquq-mühafizə orqanlarının verdiyi son məlumatlara görə, 156 nəfər həlak olub, 816 nəfər yaralanıb. Daha öncə üç mülki şəxs və bir polisin ölümü barədə məlumat verilmişdi. Urumçidə etiraz edənlər bu yaxınlarda Quandun əyalətindəki oyuncaq fabrikində işçilər arasında baş verən qarşıdurma zamanı iki uyğurun öldürülməsinə narazılıqlarını bildiriblər.
Türkiyənin Baş naziri Rəcəb Tayyib Ərdoğan Çinin Sinszyan-Uyğur muxtar rayonunda uyğurlarla çinlilər arasında baş bermiş münaqişəyə münasibət bildirərək, uyğurlara qarşı edilən zorakılığa son qoyulmalı olduğunu bildirib. Türkiyənin bir çox əyalətlərində və böyük şəhərlərində etiraz aksiyaları keçirilməkdədir və bəzi qeyri hökumət təşkilatları Çin mallarını boykot etməyə çağırıb.
Bekaroğlu hesab edir ki , Çindəki uyğurların hüquqlarının pozulmasına qarşı Türkiyədə keçirilən etiraz aksiyaları ölkənin bu məsələyə qarşı münasibətini dəyişəcək.
"Türkiyə demokratik ölkədir və xalqın hər bir hansı məsələyə etirazı hakimiyyət tərəfindən nəzərə alınacaq", - deyə o qeyd edib.
Bekaroğlunun fikrincə, ölkənin İraq, Fələstin və Əfqanıstana qarşı siyasətində məhz ictimaiyyətin böyük təsiri olub.
Məqalə müəllifi ilə əlaqə ünvanı: [email protected]
