Mətyu Brayzə Azərbaycandakı mürəkkəb məsələlərdən yayınmayacaq – ABŞ dövlət katibi köməkçisinin keçmiş müavini

ABŞ dövlət katibi köməkçisinin keçmiş müavini, ABŞ-ın Alman Marşal Fondunun (GMF) baş eksperti Devid Kramer tətil başa çatdıqdan sonra, Mətyu Brayzənin ABŞ-ın Azərbaycandakı səfiri vəzifəsinə təyinatı Xarici əlaqələr komitəsində, daha sonra isə Senatda təsdiqlənəcəyinə ümidini ifadə edib.

Devid Kramer "Mediamaks"a müsahibəsində Mətyu Brayzə ilə dost olduğunu etiraf edib. Onun sözlərinə görə, Brayzə bu iş üçün çox yaxşı hazırlanıb və "əla səfir olacaq".

"O, Azərbaycan hökuməti daxilində və ondan kənardakı bütün əsas oyunçuları tanıyır. O, ABŞ-ın maraqlarını qətiyyətlə və bacarıqla təmsil edəcək, Azərbaycanda insan haqlarının müdafiəsi və demokratik inkişafı özündə birləşdirən mürəkkəb məsələlərin həllindən yayınmayacaq", - Devid Kramer bildirib.

"Yerevanda ABŞ-ın çox çalışqan səfiri Mari Yovanoviç işləyir, Amerikanın Azərbaycanda mükəmməl şəkildə təmsil olunması Azərbaycan, Ermənistan və bütün region üçün vacibdir. Ümid edirəm, Mətyu Brayzə mümkün qədər tez təsdiqlənəcək", - deyə ABŞ-ın Alman Marşal Fondunun baş eksperti "Mediamaks"a müsahibəsində bildirib.