...

Prezident İlham Əliyev Ucar şəhər uşaq xəstəxanasının açılışında iştirak edib (FOTO)

Siyasət Materials 30 Oktyabr 2011 17:31
Oktyabrın 30-da Azərbaycan Respublikasının Prezidenti İlham Əliyev Ucar şəhər uşaq xəstəxanasının əsaslı yenidənqurmadan sonra açılışında iştirak etmişdir.
Prezident İlham Əliyev Ucar şəhər uşaq xəstəxanasının açılışında iştirak edib (FOTO)

Trend-i buradan izləyin

Azərbaycan, Bakı, 30 oktyabr /Trend/

Oktyabrın 30-da Azərbaycan Respublikasının Prezidenti İlham Əliyev Ucar şəhər uşaq xəstəxanasının əsaslı yenidənqurmadan sonra açılışında iştirak etmişdir.

Dövlətimizin başçısı xəstəxananın rəmzi açılışını bildirən lenti kəsdi.

Məlumat verildi ki, 1990-cı ildə inşa olunan uşaq xəstəxanası son illər yararsız hala düşdüyündən 2010-cu ilin avqustunda burada əsaslı yenidənqurma işlərinə başlanmışdır.

Üçmərtəbəli xəstəxana binasının həyətində yaşıllaşdırma işləri görülmüş, dekorativ ağaclar və gül kolları əkilmişdir. Xəstəxanaya gedən yola asfalt örtüyü döşənmiş, müasir işıqlandırma sistemi quraşdırılmışdır. Xəstəxana binasının birinci mərtəbəsində ulu öndər Heydər Əliyevin büstü qoyulmuşdur. Burada, həmçinin ümummilli liderin və Prezident İlham Əliyevin, Azərbaycanın birinci xanımı Mehriban Əliyevanın ölkəmizdə səhiyyənin inkişafına göstərdikləri diqqət və qayğını əks etdirən fotostendlər quraşdırılmışdır.

Bildirildi ki, xəstəxananın birinci mərtəbəsində konfrans zalı, qəbul və poliklinika şöbələri, ikinci mərtəbədə isə 10 çarpayılıq cərrahiyyə şöbəsi, bir, iki və üç nəfərlik palatalar və bir əməliyyat otağı vardır. Üçüncü mərtəbədə isə 4 çarpayılıq reanimasiya və 20 çarpayılıq pediatriya şöbələri fəaliyyət göstərəcəkdir. Xəstəxana müasir standartlara cavab verən müayinə və müalicə avadanlığı ilə təchiz olunmuşdur.

Qeyd edildi ki, 44 çarpayılıq uşaq xəstəxanasında 90 nəfərədək tibbi heyətin işləməsi nəzərdə tutulmuşdur. Xəstəxananın birinci mərtəbəsində yerləşən 40 nəfərlik konfrans zalında rayon və respublika əhəmiyyətli tədbirlərin keçirilməsi üçün lazımi şərait yaradılmışdır. Xəstəxanaya müraciət edən xəstələrin hərtərəfli müayinəsi və müalicəsi üçün burada ayrıca poliklinika da vardır.

Sonra Prezident İlham Əliyev Ucar mərkəzi rayon xəstəxanasının yenidənqurmadan sonra istifadəyə verilmiş poliklinikasında oldu.

Məlumat verildi ki, ikimərtəbəli poliklinika binası hazırda inşası davam etdirilən Ucar mərkəzi rayon xəstəxanasının bir hissəsi olmaqla tam şəkildə yenidən qurulmuşdur. Birinci mərtəbədə laboratoriya, ginekologiya, dəri-zöhrəvi kabinələri, texniki otaqlar vardır. Sahə həkimləri də burada fəaliyyət göstərəcəklər. Poliklinikanın ikinci mərtəbəsində sarğı otağı, fizioterapiya, ultrasəs müayinəsi, rentgen, laboratoriya, elektrokardioqrafiya, elektroensofoloqrafiya, stomatologiya və oftalmologiya kabinələri də vardır.

Daha sonra Prezident İlham Əliyev tikintisi davam etdirilən Ucar mərkəzi rayon xəstəxanasının baş planı ilə tanış oldu.

Xəstəxananın əvvəlki binasının fotoşəkillərinə baxan Prezident İlham Əliyevə məlumat verildi ki, 1970-ci ildə inşa olunmuş köhnə bina indiyədək təmir olunmadığından yararsız hala düşmüşdü. Yeni xəstəxana üçün 4,4 hektar torpaq sahəsi ayrılmışdır. Bu ərazinin 1,2 hektarında ikimərtəbəli 4 korpusdan ibarət kompleks tikiləcəkdir.

Xəstəxananın ərazisində təcili tibbi yardım üçün də ayrıca bina inşa olunmuşdur. Bundan əlavə, rayon patoloji anatomiya və ekspertiza şöbəsinin, o cümlədən uşaq xəstəxanasının da mərkəzi rayon xəstəxanasının yaxınlığında yerləşməsi vətəndaşlara daha yaxşı və keyfiyyətli tibbi xidmətin göstərilməsinə imkan verəcəkdir. Burada ümumilikdə 350 nəfərlik tibbi heyət çalışacaqdır.

Prezident İlham Əliyev tövsiyə və tapşırıqlarını verdi.

Xəbər lenti

Xəbər lenti