Azərbaycan, Bakı, 30 oktyabr /Trend/
Böyük Britaniya və Şimali İrlandiya Birləşmiş Krallığının Baş naziri Devid Kemeron Azərbaycan Respublikasının Prezidenti cənab İlham Əliyevə təbrik məktubu göndərib.
Məktubda deyilir: "Hörmətli cənab Prezident, yenidən Azərbaycan Respublikasının Prezidenti seçilməyiniz münasibətilə Sizi təbrik edirəm. Mən Birləşmiş Krallıq ilə Azərbaycan arasında genişlənən güclü ikitərəfli münasibətlərdən məmnunluğumu bildirirəm. Azərbaycanın iqtisadi yüksəlişi böyük təəssürat bağışlayır və şadam ki, Britaniya şirkətləri bu işdə mühüm rol oynamışlar. "Şahdəniz-2" layihəsinə dair Yekun Sərmayə Qərarı ilə bu istiqamətdə işin davam etdirilməsini səmimiyyətlə arzulayıram. Bu qərar ilin sonunadək qəbul olunarsa, xarici işlər naziri imzalanma mərasimində iştirak etmək üçün Bakıya səfərdən məmnun olardı. Bu, ölkələrimiz arasında münasibətləri daha da möhkəmləndirən önəmli mərhələ olacaqdır".
Məktubda daha sonra deyilir: "Mən, həmçinin regional təhlükəsizlik məsələlərində Sizinlə davamlı surətdə sıx əməkdaşlığa sadiq olduğumu vurğulamaq istəyirəm. Azərbaycanın Əfqanıstana verdiyi töhfəyə və Birləşmiş Krallığın hərbi təyyarələrinin hava məkanınızdan istifadə etməklə bu ölkəyə uçuşlarına göstərdiyiniz davamlı dəstəyə görə Sizə minnətdaram. Həmçinin əminəm ki, prezidentliyinizin yeni dövründə Siz Dağlıq Qarabağ münaqişəsinin həlli ilə bağlı danışıqlarda irəliləyişə nail olacaqsınız. Birləşmiş Krallıq münaqişənin sülh yolu ilə həllinə qəti surətdə sadiqdir. Eyni zamanda, ümidvaram ki, Avropa İttifaqı ilə Azərbaycan arasında əlaqələr Assosiativ Saziş və Strateji Müasirləşmə Tərəfdaşlığı vasitəsilə irəliləməkdə davam edəcəkdir.
Birləşmiş Krallıq Azərbaycanın son 20 ildə nail olduğu tərəqqini qeyd edir. Ölkənizin müasir, inkişaf edən və dünyəvi cəmiyyət quruculuğu istiqamətində uğurları böyük təəssürat bağışlayır. Azərbaycanın dostu kimi, Birləşmiş Krallıq əmindir ki, sosial və iqtisadi inkişafın demokratik və siyasi təkmilləşməyə uyğun aparılması davam edəcəkdir".
Ölkəmizdə keçirilmiş prezident seçkiləri barədə fikirlərini bildirən cənab Devid Kemeron Azərbaycanın beynəlxalq təşkilatlarla səmərəli və konstruktiv dialoq ənənəsinə bundan sonra da sadiq qalacağına əminliyini ifadə etmişdir.
Üçüncü müddətdə prezident səlahiyyətlərinin icrasına başlaması münasibətilə Prezident İlham Əliyevə böyük uğurlar arzulayan Devid Kemeron ötən il Londonda dövlətimizin başçısı ilə görüşündən məmnun qaldığını bildirmişdir.
Britaniyanın Baş naziri ümidvar olduğunu bildirmişdir ki, yaxın vaxtlarda Azərbaycan Prezidenti ilə yenidən görüşmək fürsəti yaranacaqdır.