Bakı. Elçin Mehdiyev – Trend:
Ramil Səfərov barəsində verilən əfv fərmanı beynəlxlaq hüquqi razılaşmadan irəli gəlir.
Trend xəbər verir ki, bunu Milli Məclisin Hüquq siyasəti və dövlət quruculuğu komitəsinin üzvü Nizami Səfərov parlamentin bu gün keçirilən plenar iclasında deyib.
Onun sözlərinə görə, Avropa İnsan Hüquqları Məhkəməsi qərarının çıxarılması təsadüfi xarakter daşımır və ona hazırlıq uzun illər əvvəl başlayıb.
Deputat bildirib ki, Azərbaycan Avropa Konvensiyasına qoşulan zaman “Beynəlxalq müqavilələr hüququ haqqında” 23 may 1969-cu il tarixli Vyana Konvensiyasının 19-cu maddəsinin tələblərinə uyğun olaraq 12-ci maddəyə dair qeyd-şərtlə çıxış edib:
“Həmin qeyd-şərtə əsasən, Azərbaycandan məhkum olunan şəxs barəsində verilən əfv və amnistiya qərarı Azərbaycanın müvafiq səlahiyyətli orqanları ilə razılaşdırılmalıdır. Konvensial maddə ilə belə bir qeyd-şərt Macarıstan tərəfindən edilməyib. Bununla bağlı tam məsuliyyətlə qeyd edə bilərəm ki, Azərbaycanın Konstitusiyasının 109-cu maddəsinin 22-ci bəndindən irəli gələrək 31 avqust 2012-ci il ildə cənab Prezident tərəfindən Ramil Səfərov barəsində verilən əfv fərmanı birmənalı olaraq beynəlxalq hüquqi razılaşmadan irəli gəlir və dövlətimizin öz üzərinə götürdüyü öhdəliklərin hüquqi çərçivəsindədir”.