Sentyabrın 25-də müxalifətdəki Klassik Xalq Cəbhəsi Partiyası (KXCP) İdarə Heyətinin toplantısı keçirilib. Bu barədə Trend ə KXCP sədrinin müavini Bəybala Əbil bildirib.
B.Əbil qeyd edib ki, toplantıda bir sıra məsələlərlə yanaşı Güney Azərbaycanda yaşayan soydaşlarımızın hüquqlarının qorunması istiqamətində aparılan mübarizə də müzakirə olunub. Partiya bu mübarizəni dəstəkləyib. Partiyanın qeydiyyata alınmaq üçün Ədliyyə Nazirliyinə etdiyi müraciət də geniş müzakirə obyekti olub.
KXCP rəsmisnin sözlərinə görə, partiyanın rəhbərliyi Ədliyyə Nazirliyində görüş keçirib: "Məsələnin həll olunacağı barədə bizə vəd veriblər. Bu ayın sonunadək gözləyəcəyik. Partiya məsələnin hüquq çərçivəsində həll edilməsinə tərəfdardır".
Xatırladaq ki, 2000-ci il avqustun 23-də Azərbaycan Xalq Cəbhəsi Partiyasının (AXCP) sədri, eks-prezident Əbülfəz Elçibəy vəfat etdikdən sonra partiyadaxili qarşıdurma nəticəsində sədrin müavini M.Mirəlioğlu oktyabrın 28-29-da qurultay keçirərək partiya sədri seçilib. 2006-cı il martın 26-da növbəti qurultay keçirilərək AXCP-nin adı Klassik Xalq Cəbhəsi Partiyası ilə əvəz olunub.
