Böyük Britaniya, London, 13 may/ Trend , müxbir G.Əhmədova/ Azərbaycanın mərhum eks-prezidenti Heydər Əliyevin 85 illik yubileyi münasibəti ilə Londonda azərbaycanlı gənclər arasında futbol turniri kecirilib. Azərbaycanın Britaniyadakı səfirliyinin dəstəyi, "Odlar Yurdu" Cəmiyyətinin təşkilatçılığı ilə keçirilmiş turnirdə gənclərdən ibarət səkkiz komanda istirak edib. İki qrupda yarışan komandalar arasında yarımfinal mərhələsinə "Baku United", "Fenomen", "Göy-Göl" və "Qafqaz" klubları cıxıblar.
Finalda "Fenomen" və Okforddakı azərbaycanlı gənclər tərəfindən yaradılmış "Göy-Göy" komandaları qarşılaşıblar. Gərgin mübarizə şəraitində keçən final görüşü 5-2 hesabı ilə "Göy-Göy" komandasının xeyrinə başa çatıb.
Qarşılaşmanı izləməyə gəlmiş Azərbaycanın Britaniyadakı səfiri Fəxrəddin Qurbanov qalib və ikinici yerə çıxmış komandalara qızıl və gümüş medallar təqdim edib. Qalib komanda, eyni zamanda, kuboka da layiq görülüb.
Turnirin ən yaxşı futbolçusu mükafatına "Göy-Göl" klubunun hücumçusu Marcos, ən yaxşı qapıçı mükafatına isə, "Qafqaz" futbol klubunun qapıçısı Əhməd Bekov layiq görülüblər.
Bu ilin mart ayında təsis olunmuş "Baku United" futbol klubu ilk dəfə Londonda keçirilən MDB ölkələri çempionatında iştirak edib və 1/8 finaladək irəliləyib. Bu kubok isə, "Odlar Yurdu" Cəmiyyətinin sədri İlham Nağıyevin də bildirdiyi kimi, Britaniyada futbol üzrə Azərbaycan çempionatının başlanğıcı oldu.
Londonda təşkil edilən Azərbaycan çempionatı bundan sonra hər il keçiriləcək və qarşıdakı çempioanatlara daha cox komandanın qatılacağı gözlənilir. Azərbaycan çempionatında iştirak edən gənclərdən ibarət yığma komanda isə, Azərbaycanı digər beynəlxalq turnirlərdə təmsil edəcək.
