Azərbaycan, Bakı, 16 may /Trend, müxbir İ.İsabalayeva/
Azərbaycanın Tələbə Qəbulu üzrə Dövlət Komissiyası (TQDK) ali məktəbə qəbul imtahanlarına hazırlaşan abituriyentlər üçün mayın 15-də ölkənin 25 şəhərində keçirdiyi sınaq imtahanlarının nəticələrini həftənin sonunadək açıqlayacaq. Komissiyanın mətbuat xidmətinin rəhbəri Elnur Nağızadə Trend-ə bildirib ki, nəticələr TQDK-nın internet saytında yerləşdiriləcək.
Abituriyentlər imtahan nəticələrini mobil telefonla "İmtahancell" xidməti vasitəsilə də öyrənə biləcəklər.
Nəticələr elan olunduqda "Azercell" şirkəti ilə yanaşı, "Bakcell" mobil operatorunun istifadəçiləri olan abituriyentlər də iş nömrələrini 7727 nömrəsinə göndərməklə imtahan nəticələrini öyrənə bilərlər.
TQDK mayın 15-də Bakı, Naxçıvan, Gəncə Sumqayıt, Mingəçevir, Şəki, Ağstafa, Gədəbəy, Şirvan, Lənkəran, Quba, Masallı, Salyan, Balakən, Qax, Ağcabədi, Göyçay, İsmayıllı şəhərlərində, həmçinin Naxçıvan Muxtar Respublikasının Kəngərli, Babək, Ordubad, Culfa, Sədərək, Şərur və Şahbuz rayonlarında sınaq imtahanı keçirib.