Azərbaycan, Bakı, 5 fevral /Trend/
Azərbaycanın ilk regional radio kanalı olan "Kəpəz FM" artıq 1 ildir ki, yayıma başlayıb. Kanal ötən il fevralın 5-dən 93.3 MHz tezliyində yayımlanır.
Trend-in məlumatına görə, ölkəmizdə ümumrespublika miqyasında yayımlanan bir sıra radiolar olsa da, ötən ilin fevral ayına kimi heç bir regional radio fəaliyyət göstərmirdi. MTRŞ-nin qərarına əsasən, müsabiqədə iştirak edən digər iddiaçılarla müqayisədə daha münasib maddi-texniki bazaya, peşəkar kadr potensialına, maraqlı və bu iş üçün xüsusilə aktual olan yayım konsepsiyasına malik olduğuna görə "Kəpəz" Müstəqil Teleradio Şirkəti regional radio yayımının açılması üçün 93.3 tezliyinə elan edilmiş müsabiqənin qalibi olub və ona 6 il müddətinə radio yayımı üçün xüsusi lisenziya verilməsi barədə qərar qəbul edilib.
Rəngarəng verilişləri və musiqiləri ilə "Kəpəz FM" radiosu Gəncə və ətraf rayonlarla yanaşı, Aran və ölkənin şimal-qərb rayonlarında da yayımlanır.
2013-cü ilin may ayından etibarən "Kəpəz FM" radiosunun rəsmi saytı www.kepezfm.az dinləyicilərin ixtiyarına verilib. İdeal dizayn və qrafika əsasında yığılmış sayt dinləyicilərinə bir sıra xidmətlər təklif edir. Bu sayt vasitəsilə hər bir istifadəçi radionun efirində yayımlanan verilişlər və onların müsahibləri haqda məlumat ala bilər, eləcə də "TOP 40" bölməsində bəyəndikləri musiqiyə səs verməklə seçimlərə qatıla bilərlər.
Radio imza atacağı bütün yeniliklər və layihələrlə dinləyicilərin rəğbətini qazanmağı qarşısına məqsəd qoyub və bu yolda inamla irəliləyir.