...

Prezident Aparatı sabiq işlər müdirinin apellyasiya şikayətinə dair məhkəmə iclası qeyri-müəyyən vaxtadək təxirə salınıb

Cəmiyyət Materials 27 Dekabr 2006 13:42

Trend-i buradan izləyin

Prezident Aparatının sabiq İşlər müdiri Akif Muradverdiyevin apellyasiya şikayətinə dair dekabrın 27-də Azərbaycan Respublikası Apellyasiya Məhkəməsində keçirilməsi nəzərdə tutulan məhkəmə iclası qeyri-müəyyən vaxtadək təxirə salınıb. Bu barədə Trend ə məhkəmə iclasına sədrlik edən hakim Qayıl Məmmədov məlumat verib.

Hakim bildirib ki, məhkəmə iclasının təxirə salınmasına səbəb Akif Muradverdiyevin ilkin baxış iclasından (dekabrın 13-də bu iş üzrə Apellyasiya Məhkəməsində keçirilmiş hazırlıq iclasının qərarı nəzərdə tutulur) Ali Məhkəməyə verdiyi şikayətlə əlaqədardır. Ali Məhkəmə şikayətə baxmayanadək və müvafiq qərar qəbul etməyənədək apellyasiya instansiyasında məhkəmə baxışı keçirilə bilməz.

Qeyd edək ki, dövlət əmlakını mənimsəmə və israfetmədə təqsirləndirilən Akif Muradverdiyev 31 oktyabr 2006-cı il tarixdə Ağır Cinayətlərə Dair İşlər üzrə Məhkəmənin hökmü ilə 6 il müddətinə azadlıqdan məhrum edilib. O, məhkəmənin hökmü ilə razılaşmayaraq apellyasiya şikayəti verib.

A.Muradverdiyev 2005-ci ilin oktyabr ayında dövlət çevrilişinə cəhddə təqsirləndirilərək həbs olunub. İstintaq vaxtı isə onun digər maliyyə cinayətləri də üzə çıxıb və həmin cinayətlər ayrıca istintaq olunaraq məhkəmə baxışına verilib. Dövlət çevrilişinə cəhdlə əlaqədar istintaq işi isə Milli Təhlükəsizlik Nazirliyində hələ davam edir və bu işlə əlaqədar istintaqa təqsirləndirilən şəxs qismində A.Muradverdiyevlə yanaşı keçmiş iqtisadi inkişaf naziri Fərhad Əliyev, keçmiş səhiyyə naziri Əli İnsanov və bir sıra digər yüksək vəzifəli şəxslər də cəlb olunub.

Xəbər lenti

Xəbər lenti