Azərbaycanlı voleybolçular Yeltsin Kubokunda Hollandiyaya məğlub olublar
Azərbaycan, Bakı /müx. Trend Z.Səfərov/ Azərbaycanın voleybol üzrə qadınlardan ibarət yığması Rusiyanın birinci prezidenti Boris Yeltsin Kubokuna məğlubiyyətlə başlayıb.
Trend in xəbərinə görə, komanda "quru" hesabla ötənilki yarışın bürünc mükafatçısı olan Hollandiya millisinə yenilib - 0:3. İlk partiyada hollandlar voleybolçularımızı 25:14 hesabı ilə udublar.
Fasilədən sonra isə Faiq Qarayevin yetirmələri görüşün gedişatını dəyişməyə cəhd göstəriblər. Lakin onlar bunu edə bilməyiblər və hollandlar ikinci partiyanı 25:19 hesabı ilə udublar. Üçüncü partiyada da "narıncılar"ın diqtəsi altında keçib - 25:14. Bu qələbədən sonra hollandlar qrupda liderliyi ələ keçiriblər.
Xatırladaq ki, "A" qrupunda həmçinin Çindən olan olimpiya çempionları və Rusiyanın tələbələrdən ibarət komandası çıxış edir.
