Bakı. Trend:
Azərbaycan Beynəlxalq Bankı Azərbaycan Şahmat Federasiyası ilə birgə öz təqaüdçü müştəriləri arasında respublika çempionatı keçirir.
Trend-in məlumatına görə, “Azərbaycan Beynəlxalq Bankı-2018” çempionatı bankın çoxsaylı korporativ sosial məsuliyyət layihələrindən biridir. Burada məqsəd yaşlıların ictimai aktivliyinə töhfə vermək, eyni zamanda təqaüdçülərin maliyyə savadlılığını dəstəkləməkdir.
Çempionatın açılış mərasimində içtirakçılar üçün bank əməliyyatlarının təhlükəsizliyi, plastik kartlardan istifadə qaydaları, ATM-lərdə əməliyyatlar, onlayn ödənişlər, SMS-xəbərdarlıq və s. barədə maarifləndirici təqdimat olub. Bundan başqa, onlara Azərbaycan Beynəlxalq Bankının təqaüdçü müştərilərə göstərdiyi “Pensiya+” xidməti haqqında da ətraflı məlumat verilib. “Pensiya+” əmək təqaüdçüləri üçün nəzərdə tutulan və komissiya haqqı olmayan faizsiz vəsaitdir.
“Landmark” biznes mərkəzinin ayırdığı zalda mayın 29-dan başlayaraq 5 gün davam edəcək çempionata ölkəmizin müxtəlif regionlarından şahmat dərəcələri olan 30-dan çox şahmatçı qatılıb. Azərbaycan Beynəlxalq Bankının mətbuat katibi Yadigar Cəfərli bildirib: “Azərbaycan Beynəlxalq Bankı müxtəlif sahələrdə sosial məsuliyyət layihələri reallaşdırır. Müştərilərimiz arasında təqaüdçülərin xüsusi yeri var. Onların hər biri bizim üçün dəyərlidir. Ümid edirik ki, bu çempionat onların həm xoş istirahəti, həm də maliyyə sahəsində maariflənməsi baxımından faydalı olacaq”.
Azərbaycan Şahmat Federasiyasının birinci vitse-prezidenti Faiq Həsənov isə bildirib ki, cəmiyyətdə şahmata marağın artırılmasında bu cür layihələrin rolu böyükdür: “Azərbaycanda yaşlı insanlar arasında kifayət qədər peşəkar şahmatçılar var. Biz hər il onlar üçün yarışlar təşkil edirik. Cəmiyyətimizdə şahmatı təbliğ etməyə çalışırıq. Azərbaycan Beynəlxalq Bankı kimi böyük biznes qurumlarının da bu məsələdə bizə dəstəyi çox əhəmiyyətlidir”. Çempionatın final oyunu iyunun 2-də keçiriləcək. Qaliblər qiymətli hədiyyələrlə mükafatlandırılacaq.
Müasir dövlət bankı olan Azərbaycan Beynəlxalq Bankının məhsul və xidmətləri barədə məlumatları bankın 36 filial və 40 şöbəsindən, www.ibar.az internet səhifəsindən, 937 nömrəli Məlumat Mərkəzindən, həmçinin rəsmi Facebook səhifəsindən əldə etmək olar.