Bakı. Trend:
Beynəlxalq İslam Ticarət və Maliyyə Korporasiyası (ITFC) Azərbaycan və Mərkəzi Asiyanı (TCCA+) əhatə edən regional ticarət proqramının dörd əsas məqsədini müəyyən edib.
Bunu Trend-ə özəl müsahibəsində ITFC ticarət həlləri kompleksinin baş əməliyyat direktoru Nazim Nurdəli bildirib.
"Proqramımızın dörd əsas məqsədi var. Birincisi, iştirakçı ölkələrdə məhsulların keyfiyyətini artırmaq, bu da onların dünya bazarında daha cazibədar və rəqabətədavamlı olmasını təmin edəcək. İkincisi, ticarət prosedurlarının sadələşdirilməsi. Üçüncüsü, bu ölkələr arasında regional biznes əlaqələrinin gücləndirilməsi. Nəhayət, regional rəqabət qabiliyyətinin artırılması," o qeyd edib.
N. Nurdəli xatırladıb ki, TCCA+ proqramı bu il Özbəkistanda başlayıb və altı ölkəni əhatə edir: Azərbaycan, Qazaxıstan, Qırğızıstan, Tacikistan, Türkmənistan və Özbəkistan. O, proqramın əsas məqsədinin bu ölkələrin qlobal ticarət imkanlarından maksimum dərəcədə faydalana bilmələri üçün regional inteqrasiyanı təşviq etmək olduğunu vurğulayıb.
"TCCA+ proqramı inklüziv iqtisadi artıma, regional iqtisadi əməkdaşlığın genişləndirilməsinə və bu ölkələrlə dünya ictimaiyyəti arasında ticarətin təşviqinə yönəlib", - deyə Nurdəli bildirib.
O əlavə edib ki, proqram çoxillik, çoxölkəli və çoxtərəfli xarakter daşıyır və həm özəl, həm də dövlət təşkilatlarının qarşılıqlı fəaliyyətini nəzərdə tutur. Nurdəli, həmçinin Mərkəzi Asiya ölkələri ilə ticarət əlaqələrini gücləndirmək məqsədilə BMT agentlikləri kimi beynəlxalq təşkilatları proqrama cəlb etməyə ümid etdiyini də qeyd edib.
Proqram, xüsusilə kiçik və orta sahibkarlığın (KOB) dəstəklənməsinə xüsusi diqqət yetirir. "KOB-lar bütün iştirakçı ölkələrin iqtisadiyyatında, xüsusilə də iş yerlərinin yaradılmasında mühüm rol oynayır və biz bu rolu dərk edirik," deyə Nurdəli vurğulayıb. O əlavə edib ki, proqramdan ən çox faydalanacaq sahələr kənd təsərrüfatı və emal sənayesi, həmçinin yüngül sənaye, plastik məmulat istehsalı və maşınqayırma sahələrində çalışan müəssisələr olacaq. Bundan əlavə, turizm sektorunun da KOB-larla sıx bağlı olduğu üçün əlavə təkan alacağı gözlənilir.
Aqrar sektor və ona bağlı sənayelər proqramda əsas yer tutacaq. “Kənd təsərrüfatı, yalnız ərzaq təhlükəsizliyi baxımından deyil, həm də keyfiyyətli məhsulların ixracına şərait yaradılaraq böyük inkişaf potensialına malik sahədir”, - deyə N.Nurdəli yekunlaşdırıb.