Əlcəzair. Trend:
Qazaxıstanın İslam bankçılığı sektoru, əsas ssenariyə əsasən 2033-cü ilə qədər 3,3 milyard ABŞ dollarına qədər böyüyə bilər.
Trend-in xüsusi müxbiri xəbər verir ki, bu barədə Avrasiya İnkişaf Bankı (AAİB), İslam Bankı İnstitutu (İsDBI) və London Fond Birjası Qrupunun (LSEG) İslam İnkişaf Bankının Əlcəzairdə keçirilən İllik Toplantısı çərçivəsində təqdim olunan birgə hesabatında qeyd olunur.
“Qazaxıstanda İslam maliyyə sənayesinin inkişafını təmin edə biləcək iki əsas istiqamət – islam bankçılığı və sukukdur. Bu baxımdan, habelə sektoru inkişaf etdirmək üzrə son təşəbbüsləri, müsbət perspektivləri və islam maliyyə məhsullarına olan yüksək tələbatı nəzərə almaqla, islam bankçılığının aktivlərinin 2028-ci ilə qədər 1,2 milyard ABŞ dollarına, 2033-cü ilə qədər isə 3,3 milyard ABŞ dollarına (əsas ssenari üzrə) çatacağı gözlənilir. Sukuka gəlincə – dövlətlər və şirkətlər tərəfindən həyata keçirilən qlobal yerləşdirmələr sayəsində daha da fəallaşan bu aktiv sinfi Qazaxıstan üçün öyrənmək üçün bir nümunədir – bu seqmentin həcminin 2028-ci ilə qədər 1,3 milyard ABŞ dollarına, 2033-cü ilə qədər isə 3,4 milyard ABŞ dollarına çatacağı proqnozlaşdırılır”, – hesabatda deyilir.
Müəlliflər qeyd edirlər ki, 2023-cü ilin sonuna olan vəziyyətə əsasən, Qazaxıstanda islam bankçılığı ümumi bank aktivləri 1 faizindən az olsa da, ölkə islam maliyyəsinin inkişafı üçün möhkəm təməl formalaşdırır.
Bunu, o cümlədən, İslam İnkişaf Bankının texniki dəstəyi ilə Astana Beynəlxalq Maliyyə Mərkəzi (ABMM) üçün hazırlanmış və 2020–2025-ci illəri əhatə edən Qazaxıstan Respublikasında İslam maliyyələşməsinin inkişafına dair Strateji Planın qəbul edilməsi sübut edir.