Bakı. Trend:
Azərbaycanda rəqəmsal maliyyə xidmətlərinə və innovativ həllərə əlçatanlığın artırılması imkanları müzakirə olunub.
Trend bu barədə Mərkəzi Banka istinadən xəbər verir.
Məlumata görə, Mərkəzi Bankın sədri Taleh Kazımov Azərbaycan
Fintex Assosiasiyasına (AzFina) üzv olmayan təşkilatların
nümayəndələri ilə görüşüb.
Görüş çərçivəsində fintex ekosisteminin institusional inkişaf
istiqamətləri, eləcə də rəqəmsal maliyyə xidmətlərinə və innovativ
həllərə əlçatanlığın artırılması imkanları müzakirə olunub.
Müzakirə zamanı Mərkəzi Bank tərəfindən maliyyə texnologiyaları
sektorunun inkişafını dəstəkləyən prioritet istiqamətləri və
strateji təşəbbüsləri olan Açıq bankçılıq, paylanılmış “Öz
müştərini tanı” konsepsiyası və “Kriptoaktivlər bazarı haqqında”
qanun layihəsi ətrafında fikir mübadiləsi aparılıb. Bundan əlavə,
AÖS ödənişlər sisteminin yaratdığı imkanlar və xüsusi tənzimləmə
rejiminin əhəmiyyəti vurğulanıb.
Görüşdə həmçinin təşkilatların qarşılaşdığı çətinliklər dinlənilib, təşkilatların birgə fəaliyyətinin və qarşılıqlı kommunikasiyasının gücləndirilməsinin zəruriliyi qeyd olunub.