Azərbaycan, Bakı, 22 may / Trend / MDB ölkələrinin gələcək əməkdaşlıq perspektivləri MDB-nin nəqliyyat üzrə koordinasiya şurası tərəfindən müzakirə olunacaq. Nəqliyyat Nazirliyindən verilən məlumata görə, şuranın iclası mayın 22-23-də Minskdə keçiriləcək. Azərbaycanı bu iclasda nəqliyyat naziri Ziya Məmmədov təmsil edəcək. Azərbaycan MDB-nin nəqliyyat üzrə koordinasiya şurasına müşahidəçi qismində qatılacaq.İclasda həmçinin birlik ölkələri arasında ikitərəfli və çoxtərəfli əlaqələr və bu sahədə mövcud olan problemlərin həlli yolları müzakirə olunacaq.
Azərbaycanın nəqliyyat naziri həmçinin mayın 28-30-da Leypsiqdə keçiriləcək ilk beynəlxalq nəqliyyat forumunda iştirak edəcək.
Forum nəqliyyat sahəsinə diqqət cəlb etmək, nəqliyyat problemlərinin qlobal səviyyəyə çıxarılması, bu sektorun inkişafı, həmçinin nəqliyyat problemlərinin öyrənilməsi və bunları həll etmək tədbirlərini tapılması məqsədilə dünyanın 50 ölkəsindən çox nəqliyyat nazirləri tərəfindən yaradılıb.
