Azərbaycan, Bakı, 17 iyul/ Trend , müxbir İ.Xəlilova/ 2008 -ci ilin birinci rübü ərzində respublikada fəaliyyət göstərən müəssisə və təşkilatlar (kənd təsərrüfatı müəssisələri və ABƏŞ istisna olmaqla) 1165,6 mln. manat mənfəət və 249,6 mln. manat zərər alıblar. Bu barədə Dövlət Statistika Komitəsindən məlumat veriblər.
Təsərrüfat subyektlərinin fəaliyyəti nəticəsində, onların mənfəəti ötən ilin analoji dövrü ilə müqayisədə 43,1 faiz (351 mln. manat) artıb. Mənfəətin böyük hissəsi (61,9 faiz və ya 721,3 mln. manat) sənaye müəssisələrinin hesabına təmin edilib. Nəqliyyat müəssisələri 55,8 mln. manat (ümumi mənfəətin 4,8 faizi), rabitə müəssisələri - 60,2 mln. manat (5,2 faiz), tikinti təşkilatları - 194,9 mln. manat (16,7 faiz) mənfəətlə işləyiblər.
Yanvar-mart ərzində alınmış ümumi zərərin 77,3 faizi sənaye müəssisələrinin, 7,5 faizi - tikinti təşkilatlarının, 2,8 faizi - ticarət və xidmət sahəsində müəssisələrin, 2,1 faizi - nəqliyyat müəssisələrinin və 1,2 faiz maliyyə xidmətlərinin payına düşür.
Aprelin 1-nə müəssisə və təşkilatların debitor borclarının (sistemdaxili borclar nəzərə alınmadan) həcmi 5 622,8 mln. manat təşkil edir ki, bu da ilin əvvəli ilə müqayisədə 27,6 faiz (1 214,5 mln. manat) çoxdur. 2008 -ci ilin əvvəlinə onların həcmi 4 408,3 mln. manat olub.
İyulun 17-nə olan cari məzənnə - 0,8058 AZN/USD.
Müəlliflə əlaqə saxlamaq üçün elektron ünvan: [email protected]