...

Məsləhətçi şirkət Azərbaycan şəhərlərində kanalizasiya və su təchizatının yaxşılaşdırılması layihəsi üzrə TİƏ-ni yeniləyir

Biznes və iqtisadiyyat xəbərləri Materials 5 Avqust 2008 15:57 (UTC +04:00)

Azərbaycan, Bakı, 05 avqust / Trend , müxbir İ.Xəlilova/ İsveçrənin "Colenco" Konsaltinq Şirkəti avqustun sonunadək Gəncə və Şəki şəhərlərində su təchizatı və kanalizasiya sistemlərinin bərpası layihəsinin texniki-iqtisadi əsəlandırılmasının (TİƏ) yenilənməsini başa çatdırmağı planlaşdırır. Bu barədə çərşənbə axşamı Almaniyanın KfW inkişaf bankının Bakı Ofisinin rəhbəri Natiq Abdullayev bildirib. ["Colenco" Bankın Azərbaycanda su layihələri üzrə məsləhətçisi seçilib]

"Layihənin TİƏ-ə yenidən baxılmasına zərurət onun 2003-cü ildə hazırlanması, beş il ərzində isə əhali sayının artması, buna müvafiq olaraq, suya tələbatın artması ilə əlaqədar yaranıb", - deyə Abdullayev vurğulayıb.

Aparılan hesablamalara görə, Gəncənin suya gündəlik tələbatı 900-950 litr/san-dir, layihənin reallaşdırılanadək bu həcmin əldə olunması planlaşdırılır. Abdullayev hesab edir ki, real tələbat nəzərdə tutulan vaxtadək azala bilər; sayğacların quraşdırılması ilə əhali sudan qənaətlə istifadəyə məcbur olacaq.

Layihənin reallaşdırılmasına 2009 - cu ildən başlanması və 3,5 ilə başa çatdırılması nəzərdə tutulub. Bankın ofis rəhbərinin sözlərinə görə, 2008 - ci ilin sonunadək baş podratçının seçimi üzrə tenderin keçirilməsi planlaşdırılır.

Layihənin birinci fazası Şəkidə su təminatı üzrə 100 faiz, Gəncədə 50 faiz tədbirlərin həyata keçirilməsini nəzərdə tutur. Gəncənin su təchizatı sisteminin gələcək inkişafı ikinci faza çərçivəsində nəzərdə tutulur. KfW layihənin səmərəliliyini təmin etmək məqsədilə tariflərin artırılması məsələsini qaldırmır; ilkin mərhələdə hökumət qarşısında bu təklif irəli sürülmüşdü. Abdullayev hesab edir ki, hazırkı tariflər (1 kub metr suya görə 0,22 manat) tamamilə məqbuldur, gələcəkdə sudan istifadəyə görə yığım əmsalının artırılması gözlənilir.

Layihə Gəncə və Şəkidə kanalizasiya və su təchizatı sistemlərinin keyfiyyət və etibarlılığının yaxşılaşdırılmasını nəzərdə tutur. Layihənin birinci fazasının büdcəsi 55 mln. avro təşkil edir. 2006 - cı ilin oktyabrında Bern şəhərində imzalanan müqaviləyə əsasən, layihənin reallaşdırılması üçün KfW 37 mln. avro həcmində kredit təqdim edəcək. İsveçrənin İqtisadi Məsələlər üzrə Dövlət Katibliyi (Seco) 10 mln. avro qrant ayıracaq. Layihədə Azərbaycan hökumətinin payı 8 mln. avro təşkil edir.

Avqustun 5-nə olan rəsmi məzənnə 0,8096 AZN/USD təşkil edir.

Məqalə müəllifi ilə əlaqə ünvanı: [email protected]

Xəbər lenti

Xəbər lenti