Azərbaycan, Bakı, 24 oktyabr / Trend müxbir N.İsmayılova, İ.Xəlilova/ MDB məkanında qarşılıqlı hesablamaların milli valyutada aparılması yalnız dövlətlərin iqtisadiyyatının möhkəmlənməsi və innovasiya inkişaf kursunun tətbiqi nəticəsində mümkün ola bilər. Bunu MDB Maliyyə-bank Şurasının Əlaqələndirici şurasının sədri Anatoliy Kazak ötən günü Bakıda bildirib.
İlk öncə iqtisadiyyatın strukturunun dəyişdirilməsinin zəruri olduğunu qeyd edən Anatoliy Kazak deyib, "Sonra milli valyuta ilə hesablaşmalar daha yüksək səviyyəyə qalxacaq. Hansı valyuta iqtisadi baxımdan qələbə qazanacaqsa, o da MDB məkanında ehtiyyat valyuta rolunu oynayacaq".
Onun sözlərinə görə, Rusiya artıq beynəlxalq maliyyə mərkəzinin yradılması, habelə rublu möhkəmləndirərək onu ehtiyyat valyuta kimi tətbiq etməyə istiqamət götürüb. Hazırda MDB məkanında hesablaşmaların 10-15 faizi (təxminən 200 milyard rubldan çox) rubl ilə aparılır.
MDB Maliyyə-bank şurasının baş direktoru Nefidov hesab edir ki, ilk növbədə, neft və qaz satışı üzrə hesablaşmalar rubl ilə aparıla bilər. Hazırda bu hesablaşmalar dollar və avro ilə həyata keçirilir. Bunun nəticəsində klirinq əməliyyatlarında böyük itkilərə yol verilir.
Nefidov vurğulayıb ki, milli valyutanın rolunun artırılması nəinki Rusiyanın əsas vəzifəsidir, bu həmçinin neft hasil edən ölkələr olan Azərbaycan və Qazaxıstan üçün də vacibdir.
Əlaqələndirici şuranın sədri Anatoliy Kazak bildirib ki, milli valyutalarla birbaşa hesablaşmalrın aparılması üçün süni valyutanın tətbiq edilməsində zərurət yoxdur. Bunu birbaşa klirinq əməliyyatını nizamlamaq vasitəsilə gerçəkləşdirmək olar.
Mütəxəssislərin rəyincə birneçə il ərzində ölkələr arasında müvafiq əməliyyatların həcmi artacaq və bazara yeni oyunçular gələcək.
Anatoliy Kazak qeyd edib ki, klirinqin həyata keçirilməsində mərkəzi bankların cəlb olunmasına ehtiyac qalmır. Bununla belə, mərkəzi banklar milli bank sektorunun fəaliyyətini nizamlamalıdır. Bunun üçün müstəqil və qeyri-kommersiya klirinq strukturunu yaratmaq lazımdı.
Məqalə müəllifi ilə əlaqə ünvnanı: [email protected]