Azərbaycan, Bakı, 30 yanvar/ Trend , müxbir Ü.İsmayılova/
Azərbaycanın Dövlət Gömrük Komitəsi (DGK) artıq iki ildir ki, Gömrük Məcəlləsinin yeni redaksiyasını hazırlasa da, prosesin çətinliyi ilə əlaqədar, indiyədək onun prezident aparatına təqdim edilməsinə nail ola bilməyib, - DGK-nın rəhbəri Aydın Əliyev 2008 - ci ildə fəaliyyətin yekunlarına həsr olunmuş kollegiya iclasında bildirib.
Sənəd beynəlxalq ekspertlərin yardımı ilə hazırlanıb.
Əliyevin sözlərinə görə, Məcəllə hazırlığın birinci mərhələsində bütün daxili prosedurları, eləcə də, rəy və təkliflər alınması üçün ikinci mərhələdə 24 müvafiq qurumla razılaşdırmadan keçib.
Əliyevin sözlərinə görə, Dövlət Gömrük Komitəsi artıq 21 rəy alıb və yaxın vaxtlarda qalan rəylərin də alınmasına ümid edir.
"Bütün rəy və təkliflər alındıqdan sonra Gömrük Komitəsi Məcəllənin yeni redaksiyasını Nazirlər Kabinetinə, sonra isə prezident aparatına təqdim edəcək", - Əliyev vurğulayıb.
Qanunvericilik bazasının beynəlxalq standartlara müvafiq olaraq təkmilləşdirilməsi BMT İnkişaf Proqramı və Avropa İttifaqının gömrük xidmətinin təkmilləşdirilməsi layihəsi çərçivəsində nəzərdə tutulub. Azərbaycanda gömrük sisteminin davamlı inkişafını təmin etmək vəzifələrindən biri Gömrük Məcəlləsinin yeni variantının hazırlanması olub.
Bunun üçün əvvəllər Rusiya və Qazaxıstanda işləmiş ekspert cəlb edilib. Məcəllədə informasiya texnologiyaları tətbiq olunub, gömrük əməkdaşının imkanları və fəaliyyətini şərtləndirən maddələrə xüsusi diqqət verilib.
Məcəllənin mövcud variantı 1997 - ci ildə qəbul edilib. 2007 - ci ilin fevralında gömrük sisteminin beşillik inkişaf proqramı (2007 - 2011 - ci illər) təsdiq edilib. Bu proqramın prioritetləri gömrük orqanlarının maddi - texniki bazasının yaxşılaşdırılması, kadrların hazırlanması, gömrük nəzarəti sisteminin gücləndirilməsi, fiskal funksiyanın yerinə yetirilməsi, gömrük cinayətləri ilə mübarizə, gömrük sahəsində müasir informasiya texnologiyalarının tətbiqidir.
Müəlliflə əlaqə saxlamaq üçün elektron ünvan: [email protected]
