Azərbaycan, Bakı, 18 avqust / Trend , müxbir D.Xatınoğlu /
İran və Türkmənistan arasında əmtəə dövriyyəsi iki ölkənin iqtisadi potensialı nəzərə alınmaqla gələcəkdə də artacaq, bazar ertəsi Aşqabaddan telefonla İranın Türkmənistandakı səfiri Məhəmməd Rza Forqani bildirib. Səfirin sözlərinə əsasən, iki ölkə arasında iqtisadi əməkdaşlıq hər il daha da inkişaf edir, ikitərəfli əmtəə dövriyyəsi sürətlə artır.
"2006-cı ildə əmtəə dövriyyəsi 1,4 milyard dollar, 2007-ci ildə 1,9 milyard dollar təşkil edirdisə, 2008-ci ildə bu rəqəm üç milyard dollara çatıb", - Forqani bildirib.
Forqaninin sözlərinə əsasən, əmtəə dövriyyəsinin əsas hissəsini İranın Türkmənistandan idxal etdiyi məhsullar təşkil edir. Həmin məhsullar arasında neft, benzin, mazut, qaz, maye qaz, neft-kimya məhsulları, həmçinin pambıq yer alır.
"İrandan Türkmənistana ixracının həcmi də artıb, belə ki, o, 2008-ci ildə 300 milyon dollar təşkil edib", - Forqani bildirib.
Statistikaya əsasən, İran ilə əmtəə dövriyyəsi həcminə görə Orta Asiya ölkələri arasında Türkmənistan birinci yeri tutur, keçmiş SSSR ölkələri arasında isə Rusiyadan geri qalaraq ikinci yeri tutur.
Məqalə müəllifi ilə əlaqə ünvanı: [email protected]
