Azərbaycan, Bakı, 30 oktyabr / Trend , müxbir Ü.İsmayılova/
Azərbaycanın iri sığorta şirkətlərindən biri olan MBASK ötən illə müqayisədə 2009-cu ilin yekunlarına görə yığılmış sığorta haqlarının 50 faiz azalacağını təxmin edir. Bu barədə cümə günü şirkətin İdarə Heyətinin sədri Cəmil Məlikov məlumat verib.
"İlin yekunlarına görə şirkətin yığdığı sığorta haqqı 7-8 milyon manat təşkil edir", - Məlikov deyib.
Onun sözlərinə görə, şirkətin sığorta haqları yığımında göstəricisinin aşağı olması ölkənin sığorta bazarındakı ümumi vəziyyətlə əlaqədardır. Hazırda şirkət əsasən korporativ müştərilərə xidmət göstərir.
2008-ci ildə şirkət 18,55 milyon manatlıq sığorta haqqı yığıb, 5,96 milyon manatlıq sığorta ödənişi həyata keçirib.
Cari ilin yanvar-sentyabr aylarında MBASK şirkəti həyata keçirdiyi 4,78 milyon manat həcmindəki sığorta ödənişi müqabilində 5,39 milyon manat sığorta haqqı yığıb və bu müddət ərzində sığortaçılar arasında reytinqdə 10-cu yeri tutub.
MBASK Sığorta Şirkəti Azərbaycan sığorta bazarında 1992-ci ildən fəaliyyət göstərir. Bu gün şirkət 29 sığorta növü həyata keçirir. Bunlardan dördü icbari sığorta növü üzrədir. Şirkətin nizamnamə kapitalı iki milyon manat təşkil edir.
2005-ci ilin yanvar ayından MBASK Sığorta Şirkətinin səhmlərinin 30 faizi Avropa Yenidənqurma və İnkişaf Bankına məxsusdur. Onun əsas təsisçisi Unibank-dır. Hazırda şirkətdə 25 min sığorta müqaviləsi bağlanıb. 2008-ci ildə isə bu göstərici 40 min idi.
Məqalə müəllifi ilə əlaqə ünvanı: [email protected]