Azərbaycan, Bakı, 29 oktyabr /Trend, müxbir E.İsmayılov/
Ələt qəsəbəsində (Bakı yaxınlığında) yeni beynəlxalq dəniz limanının tikintisi çərçivəsində işlərə yaxın vaxtlarda başlanacaq. Bu barədə cümə günü Trend-ə Azərbaycanın nəqliyyat naziri Ziya Məmmədov bildirib.
"Konkret müddəti deyə bilmərəm, lakin tikinti işlərinə yaxın vaxtlarda başlanacağı gözlənilir", - Məmmədov deyib.
Nazirin sözlərinə görə, Azərbaycanın Nəqliyyat Nazirliyi tikintiyə başlamağa artıq hazırdır.
Bir az əvvəl layihəyə yaxın olan mənbənin verdiyi məlumata görə, Azərbaycanın Nəqliyyat Nazirliyi bu ilin noyabrın əvvəllərində yeni limanın tikintisinə başlamalıdır.
Ələt qəsəbəsində yeni dəniz limanının tikintisi üç mərhələdə həyata keçiriləcək və 2015-ci ildə başa çatdırılacaq. Layihənin 2008-2010-cu illəri əhatə edən birinci mərhələsində konteynerlərin, "ro-ro" tipli gəmilərin və adi (universal) quru yüklərin qəbulu üçün iki bərə, üç yük körpüsünün inşası nəzərdə tutulur. 2011-2013-cü illəri əhatə edən ikinci mərhələdə daha üç yük körpüsünün inşası, üçüncü mərhələdə isə (2014-2015) iki əlavə yük körpüsünün inşası nəzərdə tutulur. Limanın inşa layihəsi 400 milyon dollardan çox qiymətləndirilir.
Ələt limanı çoxmodullu olacaq. Belə ki, logistika mərkəzi ilə yanaşı, gələcəkdə bu ərazidə azad iqtisadi zonaların yaradılması planlaşdırılır.