Azərbaycan, Bakı, 21 yanvar /Trend, müxbir N.İsmayılova/
2011-ci il yanvarın 1-nə olan vəziyyətə görə, Azərbaycanda rəsmən 38,9 min nəfər işsiz qeydə alınıb. Onların 43,6 faizi qadındır. Bu barədə Azərbaycan Dövlət Statistika Komitəsindən bildiriblər. Ölkədə bir vakant yerə 4 işsiz namizəddir.
Hesabat dövrü ərzində ölkə əhalisinin iqtisadi fəal hissəsinin sayı 4346,3 min nəfər təşkil edib. Bununla yanaşı, 2010-cu ilin yanvar-noyabr aylarında muzdla işləyənlərin sayı 1363,9 min nəfər olub. Onlardan 856,9 min nəfər dövlət, 490,6 min nəfər isə özəl sektorda çalışır.
Muzdla işləyənlərin ümumi sayından 20,3 faiz əmtəə istehsalı sahəsində, 2,6 faiz hasilat sənayesində, 6 faiz emal sahəsində, 5 faizi tikintidə, 2,9 faiz kənd, meşəçilik və balıqçılıq təsərrüfatında çalışır.
Bu dövr ərzində xidmətlər sahəsində 25,5 faiz təhsil sahəsində, 19,8 faiz pərakəndə və topdansatış, avtomobil və motosikletlərin təmirində, 10 faiz əhaliyə tibbi və sosial xidmətin göstərilməsində, 5,7 faiz nəqliyyatda, 1,8 faiz rabitədə, 0,6 faiz daşınmaz əmlak əməliyyatlarında, 3,9 faiz icarə, dövlət idarəçiliyi, müdafiədə və 0,9 faiz digər sahələrdə cəmləşib.
İşsizlik üzrə müavinətin orta məbləği 190,9 manat təşkil edir.
