Azərbaycan, Bakı, 2 mart /Trend, müxbir N.İsmayılova/
Azərbaycan İnvestisiya Şirkəti (AİŞ) IPO vasitəsilə maliyyələşdirdiyi layihələrin səhmdarlarından çıxmaq imkanı məsələsinə baxmaq niyyətindədir. Bu barədə çərşənbə günü şirkətin icraçı direktoru Əfqan İsayev deyib.
"Bizim çıxmaq strategiyamız IPO vasitəsilə iştirak etdiyimiz layihələrin səhmdarlarının tərkibindən çıxmaqdan da ibarətdir və buna görə ilk növbədə layihələr üzrə tərəfdaşlarımızla işləməyə çalışacağıq", - o bildirib.
İsayevin sözlərinə görə, IPO vasitəsilə çıxmaq investisiya şirkətinə kapital bazarının stimullaşdırılması üçün imkan verəcək. Səhmlərin satışının bu üsulu daha şəffafdır və bazara qiyməti müəyyənləşdirməyə imkan verəcək.
"Buna nə vaxt başlayacağımızı indi demək çətindir, çünki bu asan proses deyil", - o qeyd edib.
Hazırda AİŞ M-Pro şirkətində səhmlərin 20 faizinə sahibdir. Orada artıq apreldə işə salınacaq yeni süd zavodunun tikintisi artıq başa çatmaq üzrədir. İlkin mərhələdə zavodun gücü sutkada 80 tondan 100 tonadək olacaq.
"Azərsun Holdinq" ilə birlikdə həyata keçirilən "Səngaçal-Qaradağ neft-qaz terminalı"nın tikintisi üzrə layihədən çıxmaq müddəti hələ ki açıqlanmır", - AİŞ rəhbəri bildirib.
"Müqavilə üzrə bu layihənin yalnız birinci mərhələsində iştirak edirik, buna görə də həmin layihədən çıxmaq strategiyasını hələ müzakirə edəcəyik", - İsayev qeyd edib.
AİŞ Müşahidə Şurasının 29 iyun 2007-ci il tarixli qərarına əsasən, 9 milyon dollar qoyaraq QSC-nin nizamnamə kapitalının 25 faizini alıb.
İsayevin sözlərinə görə, AİŞ-ə 10 faizin məxsus olduğu "Qaradağ Sement" sement zavodunun gücünün genişləndirilməsi layihəsini də 2011-ci ilin dördüncü rübündə başa çatdırmaq planlaşdırılır. Sement zavodunun kapitalında 13,7 milyon manat iştirak payının alınmasına dair saziş 2008-ci il fevralın 14-də imzalanıb.
AİŞ ölkə Prezidentinin sərəncamı ilə 30 mart 2006-cı il tarixində yaradılıb. Şirkətin yeganə təsisçisi İqtisadi İnkişaf Nazirliyidir.
Şirkət yaradılan zaman 90 milyon məbləğində formalaşmış AİŞ-in nizamnamə kapitalı 2010-cu ilin əvvəlində 160 milyon manatadək artırılıb.
