Azərbaycan, Bakı, 10 mart /Trend, müxbir Ü.İsmayılova/
2010-cu ildə işlərin yekunu üzrə Azərbaycanda yeganə dövlət sığorta şirkəti olan "Azərsığorta"nın sığorta mükafatları ölkədə fəaliyyət göstərən sığortaçıların yığımlarının ümumi həcminin 15,5 faizini təşkil edib. Bu barədə şirkətin sədri Məmməd Məmmədov cümə axşamı rəsmi mətbuatda dərc olunmuş müsahibəsində bildirib. Ötən il ərzində şirkətin mükafatları 24,185 milyon manat olub.
"Hazırda şirkət 28 növdə sığorta xidmətləri göstərir. Şirkət ölkənin bütün regionlarında öz filiallarını açıb. Sığorta təminatının yaradılması məqsədilə bu nümayəndəliklər yüksək ixtisaslı kadrlarla təmin olunub", - Məmmədov bildirib.
Onun sözlərinə görə, "Azərsığorta" sığortalananlar qarşısında öz öhdəliklərini yerinə yetirmək üçün həm yerli, həm də xarici təkrarsığorta şirkətləri ilə əməkdaşlıq edir.
"Bir sıra işlərin görülməsinə baxmayaraq, hələ də istənilən nəticələr əldə olunmayıb", - Məmmədov bildirib.
Buna baxmayaraq, şirkət əlverişli vəziyyətdən istifadə edərək, ölkə iqtisadiyyatının sahələrindən biri kimi sığorta bazarının inkişafı məqsədilə qüvvədə olan qaydaların təkmilləşdirilməsi yolu ilə yeni sığorta qaydaları işləyib hazırlayır. Bu da sığorta hadisələri zamanı fiziki və hüquqi şəxslərə vaxtında ödənişlər etməyə imkan verir.
"Azərsığorta" dövlət şirkəti 1992-ci ildə Sovet İttifaqı dağıldıqdan sonra keçmiş dövlət sığortasının bazasında yaradılıb. Şirkət ölkənin bütün şəhər və rayonlarında 80 sığorta agentliyinə sahibdir. 2011-ci ilin yanvar ayı ərzində fəaliyyətin yekunları üzrə şirkətin sığorta haqları 750,384 min manat, ödənişləri isə 589,305 milyon manat təşkil edib.
Martın 10-na olan rəsmi məzənnə 0,7936 AZN/USD təşkil edir.
