Azərbaycan, Bakı, 20 may /Trend, müxbir İ.Xəlilova/
Beynəlxalq Valyuta Fondu (BVF) Azərbaycanda monetar və məzənnə siyasətinin strukturunun təkmilləşdirilməsi üzrə texniki yardımın göstərilməsinə razılıq verib. Bu barədə Trend-ə cümə günü hökumətdən bildiriblər.
"Azərbaycan Mərkəzi Bankı fonddan milli valyutanın mübadilə məzənnəsinin daha çevik rejiminə keçid üçün yardımın göstərilməsini xahiş edib", - hökumətdən deyiblər.
Ölkənin Mərkəzi Bankı milli valytanın məzənnəsinə nəzarət edir ki, manatın məzənnəsinin həddən artıq möhkəmlənməsindən yayınsın. Daxili valyuta bazarında dolların təklifinin artımı müşahidə edilir. Bu, manatın məzənnəsinin möhkəmlənməsinə səbəb olub, lakin Mərkəzi Bank vəziyyəti nəzarət altında saxlayaraq milli valyutanın məzənnəsinin həddən artıq möhkəmlənməsinin qarşısını alır.
Bununla əlaqədar 2011-ci ilin birinci rübündə Mərkəzi Bankın ölkənin valyuta bazarında intervensiyasının həcmi 156 milyon dollar təşkil edib. Bu halda, AMB nümayəndələrinin qeyd etdiyinə görə, valyuta bazarı özünütənzimləyən rejimdə fəaliyyət göstərib.
2011-ci ilin əvvəlindən AMB valyuta bazarında təklif kanallarının genişləndirilməsi və yeni əməliyyat mexanizmi şəraitində özünün məzənnə siyasətini həyata keçirib.
Cari ilin birinci rübü ərzində manatın dollara nisbətdə məzənnəsi 0,65 faiz möhkəmlənib. Bu il ərzində milli valyutanın sabitliyi makroiqtisadi və maliyyə sektorunun sabitliyinə müsbət təsir göstərib.
Ölkənin İqtisadi İnkişaf Nazirliyi tərəfindən hazırlanan 2011-2025-ci illər üçün Azərbaycanın uzunmüddətli iqtisadi inkişaf strategiyası layihəsində manatın nominal məzənnəsinin ortaillik dəyişikliyi 1 faiz səviyyəsində proqnozlaşdırılır. 2009-cu ilin yekunları üzrə milli valyutanın məzənnəsi 1,8 faiz, 2010-cu ildə isə 0,6 faiz möhkəmlənəcək.
Manatın məzənnəsinin möhkəmlənməsi müəyyən qədər ölkənin qeyri-neft ixracının inkişafına kömək edə bilər, lakin bu, inflyasiya məsələsində sözsüz ki, müsbət faktdır, çünki valyutanın möhkəmlənməsi idxalın ucuzlaşması deməkdir.
Buna görə də hazırda Mərkəzi Bankın qarşısında duran əsas vəzifə inflyasiyanın birmənalı olaraq stabil vəziyyətdə saxlanılmasıdır. Bu, uzunmüddətli perspektivdə proqnozlaşdırılır. Hökumət inflyasiyanı aşağı səviyyədə saxlamaq və milli valyutanın məzənnəsinin həm ucuzlaşma, həm də bahalaşma tərəfinə kəskin dəyişməsinin qarşısını almaq vəzifəsini qoyur. Bu halda uzunmüddətli perspektivdə Azərbaycan Mərkəzi Bankı çevik məzənnə siyasəti fonunda sərbəst üzən milli valyuta məzənnəsi rejiminə keçməyi planlaşdırır.
Birinci rübdə qeyri-neft sektoru üzrə nominal effektiv məzənnə ümümi mal dövriyyəsində 2,2 faiz ucuzlaşıb. Tərəfdaş ölkələrdə inflyasiya nominal effektiv məzənnənin 1,5 faiz artmasına kömək edib. Qeyri-neft sektoru üzrə nominal effektiv məzənnə 0,8 faiz ucuzlaşıb. Hesabat dövrü ərzində nominal effektiv məzənnə və real effektiv məzənnə müvafiq olaraq 1,5 faiz və 1,7 faiz bahalaşıb.
