Azərbaycan, Bakı, 29 sentyabr /Trend, müxbir A.Axundov/
İqtisadi əməkdaşlıq üzrə Azərbaycan-Qazaxıstan hökumətlərarası komissiyanın cümə axşamı keçirilən VIII iclasında iki ölkənin müvafiq orqanlarına Azərbaycanda İxracın və İnvestisiyaların Təşviqi Fondu (AZPROMO) ilə "Kaznex Invest" İxrac və İnvestisiyalar üzrə Milli Agentlik arasında əməkdaşlığı genişləndirmək tapşırığı verilib. Trend-in məlumatına görə, bu barədə cümə axşamı iclasın yekunlarına dair imzalanmış protokolun mətnində deyilir.
"Həmçinin, müvafiq strukturlara iki ölkədə qarşılıqlı iqtisadi və ticarət əlaqələrinin inkişafı məqsədilə keçirilən sərgilər haqqında informasiya mübadiləsi aparmaq tapşırığı verilib", - protokolda deyilir.
Azərbaycan və Qazaxıstanın Ticarət-Sənaye palataları arasında cari reallıqlara və gələcək perspektivlərə cavab verən sazişin imzalanması gözlənilir.
2011-ci ilin birinci yarısında iki ölkə arasındakı əmtəə mübadiləsi 142,07 milyon dollar təşkil edib ki, bu da ötən ilin müvafiq dövr göstəricisindən 2,1 faiz çoxdur.
Dövlət və özəl sektorun birgə təşəbbüsü olan Azərbaycanda İxracın və İnvestisiyaların Təşviqi Fondu (AZPROMO) İqtisadi İnkişaf Nazirliyi tərəfindən 2003-cü ildə təsis edilib. Təşkilatın əsas fəaliyyət istiqamətlərindən biri xarici investorlar, yerli istehsalçılar və hökumət arasında körpü funksiyasının həyata keçirilməsindən ibarətdir.
"Kaznex Invest" də 2003-cü ildə təşkil olunub və Qazaxıstanın inkişafı üzrə milli institutlardan biridir. Təşikilatın məqsədi Qazaxıstanın qeyri-xammal ixracının inkişafı və birbaşa xarici investisiyaların iqtisadiyyatın prioritet sektorlarına cəlb olunması üçün milli iqtisadiyyatın daha əlverişli şəraitin hazırlanması yolu ilə şaxələndirilməsinə kömək etməkdir.
