Azərbaycan, Bakı, 15 noyabr /Trend, müxbir A.Axundov/
Azərbaycan hökuməti Ümumdünya Ticarət Təşkilatının (ÜTT) çoxtərəfli danışıqların IX raundunun vaxtını 2012-ci ilin əvvəlinə keçirilməsi ilə bağlı təklifini qəbul edib. Bu barədə çərşənbə axşamı Trend-ə işçi qrupunun rəhbəri, Azərbaycan xarici işlər nazirinin müavini Mahmud Məmmədquliyev deyib. Əvvəl ÜTT-nin işçi qrupu ilə görüşün dekabrın 9-da Cenevredə keçirilməsi gözlənilirdi.
"Bir gün əvvəl ölkələrin bu təşkilata qəbulu ilə məşğul olan ÜTT-nin departamenti ilə aparılan məşvərətlərin yekunu üzrə yekdil fikrə gəldik ki, görüşü 2012-ci ilin yanvarına və ya fevralına keçirək", - Məmmədquliyev bildirib.
Nazir müavininin sözlərinə görə, ÜTT-nin Azərbaycanla çoxtərəfli danışıqların vaxtını dəyişdirməsinin səbəbi onunla bağlıdır ki, təşkilatın gündəliyində çoxlu məsələlər var. Bunlardan biri də Rusiyanın bu təşkilata qəbul olunmasıdır.
"Dekabrın ortalarında ÜTT-nin üzv ölkələrinin ticarət nazirləri səviyyəsində görüşün keçirilməsi gözlənilir. Bu illik konfransdır ki, burada ÜTT ilə danışıqların Doha raundu çərçivəsində dünya ticarətinin gələcək liberallaşdırılması barədə məsələlər müzakirə ediləcək. Buna görə də ÜTT-nin departamenti Azərbaycan tərəfindən bu görüşün gələn ilin əvvəlinə keçirilməsini xahiş edib ki, biz də bununla razılaşmışıq", - Məmmədquliyev deyib.
G20 ölkələrinin liderləri 2011-ci ili dünya ticarəti üzrə Doha danışıqları raundunun yekunlaşması üçün unikal şans hesab edirlər. Bu barədə Seuldakı sammitin yekunu üzrə qəbul edilən bəyannamədə deyilir.
Sənədə uyğun olaraq, "iyirmilik" sammitinin yekunlarından biri G20 liderlərinin hər şeyi əhatə edən danışıqlarda iştirak üzrə öz nümayəndələrinə göstəriş verməsində qətiliyidir. Bu da Doha raundu inkişafının mandatı və artıq əldə edilən tərəqqiyə uyğun olaraq, Doha raundunu operativ şəkildə uğurlu, məqsədyönlü və balanslaşdırılmış sonluğa çatdırmağa imkan verəcək.
Doha raundu 2001-ci il yanvarın 1-də ÜTT-nin 2000-ci ilin noyabrında Dohada (Qətər) keçirilən dördüncü nazirlər səviyyəsində konfransının müvafiq qərarından sonra başlanıb. Həmin vaxt danışıqlar raundunun sənaye tariflərinin aşağı salınması, xidmətlər, əqli mülkiyyətin ticari aspektləri, subsidiyalaşma və antidempinq üzrə ÜTT-nin qaydaları, eləcə də kənd təsərrüfatına dəstək məsələləri üzrə sazişlər paketinin 2005-ci ilin sonuna qədər başa çatdırılması gözlənilirdi.
Azərbaycanın ÜTT ilə növbəti çoxtərəfli danışıqlarının raundu çərçivəsində üzv ölkələr üçün Azərbaycanın yeni "Factual Summary" toplu hesabatı müzakirə ediləcək. Əvvəl Azərbaycan hökuməti ÜTT-nin üzv ölkələrinin suallarına cavabı Katibliyə təqdim edib, onun əsasında isə "Factual Summary" toplu hesabat hazırlayıb.
Sonuncu görüş (çoxtərəfli danışıqların VIII raundu) 2010-cu il oktyabrın 18-də Cenevredə baş tutub, həmin il oktyabrın 19-22-də isə ABŞ, Aİ, Kanada, Yaponiya, Norveç, İsveçrə, Çinin Tayvan əyaləti və ÜTT-nin digər üzvlərinin mal və xidmətlər məsələləri üzrə ikitərəfli görüşləri keçirilib.
2011-ci ilin iyulun 25-29-da Azərbaycan nümayəndə heyəti Cenevrədə bir sıra ölkələrlə, o cümlədən Aİ, Ekvador, İsveçrə, Braziliya və Çinlə ikitərəfli görüşlər keçirib. ABŞ çoxtərəfli danışıqların gedişatında Azərbaycanın işçi qrpu ilə görüşmək istəyini bildirib.
Nazir müavini ÜTT-nin üzv ölkələri ilə növbəti ikitərəflı danışıqların vaxtını söyləməkdə çətinlik çəkib. "Yaxın vaxtlarda ikitərəfli danışıqların keçirilməsi gözlənilmir, sonuncu görüş iyulda olub", - Məmmədquliyev deyib.
Hazırda Azərbaycan ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti ilə danışıqlar prosesindədir.
Azərbaycan danışıqlara 2004-cü ildə qoşulub.
Bu günədək Azərbaycan Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə hələ sənədləri nəzərdən keçirən Moldova ilə protokolun imzalanma mərhələsindədir, Qırğızıstan isə imzalanmaya razılıq verib.
Danışıqlar çərçivəsində Azərbaycan milli hüquq bazasının ÜTT-nin tələblərinə uyğunlaşdırılması, mövcud ticarət rejiminin təkmilləşdirilməsi işini davam etdirir. Təxminən 40-50 qanunvericilik aktı təşkilatın tələblərinə uyğunlaşdırılmalıdır. Onlardan təxminən 30 sənəd artıq vahid şəklə salınıb. Gələn il bu istiqamətdə işlər davam etdiriləcək.
ÜTT Katibliyi yanında Azərbaycan üzrə işçi qrupu 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.
