Azərbaycan, Bakı, 7 iyul /Trend, müxbir Ə.Həsənov/
2012-ci ilin yanvar-may aylarında dövriyyədə olan pul kütləsi (dövriyyədəki nağd pulların (banklardan kənarda) və maliyyə təşkilatlarının (kredit təşkilatlarından başqa) və fiziki şəxslərin hesablarındakı milli valyuta vəsaitləri qalıqlarının, M2) 2011-ci ilin analoji dövrü ilə müqayisədə 36,7 faiz, 2012-ci il aprelin 1-nə nisbətən isə 2,2 faiz artıb.
Trend-in məlumatına görə, bu barədə şənbə günü Azərbaycan Mərkəzi Bankının (AMB) statistik hesabatında bildirilir.
Belə ki, 2012-ci il iyunun 1-nə olan vəziyyətə görə, M2 göstəricisi 11456,7 milyon manat təşkil edib. 2011-ci il iyunun 1-nə bu rəqəm 8392 milyon manat, 2012-ci il mayın əvvəlinə isə 11202,4 milyon manat olub.
2012-ci il iyunun 1-nə olan vəziyyətə görə, nağd pul kütləsi (M0) 7509,9 milyon manat təşkil edib. 2011-ci il iyunun 1-də bu rəqəm 5610,3 milyon manat, 2012-ci il mayın 1-də isə 7312,8 milyon manat olub.
2012-ci il iyunun 1-nə olan vəziyyətə görə, genişlənmiş pul kütləsi (Broad Money Supply (M3) 14579,5 milyon manat təşkil edib. 2011-ci il iyunun əvvəlində bu rəqəm 11056,1 milyon manat, 2012-ci il mayın əvvəlində isə 14346,2 milyon manat təşkil edib.
2012-ci il mayın əvvəlinə olan vəziyyətə görə, sövdələşmələr üçün məbləğlər (transaction money (M1) 9194,7 milyon manat təşkil edib. 2011-ci il iyunun əvvəlində bu rəqəm 6833,6 milyon manat, 2012-ci il aprelin əvvəlində isə 8972,4 milyon manat olub.
