Ümumdünya Ticarət Təşkilatının (ÜTT) Katibliyi Azərbaycanın bu təşkilata üzvlüyü ilə bağlı növbəti danışıqlarının tarixini martın 30-na təyin edib. Bu barədə Trend ə hökumətdən məlumat verilib. Bakı bu barədə ötən həftənin sonlarında məlumatlandırılıb.
Danışıqlarda ABŞ, Kanada və Avropa İttifaqının nümayəndələri ilə ikitərəfli görüşlər keçiriləcək, xidmətlər və ticarət üzrə təkliflər müzakirə olunacaq. Danışıqlara hazırlıq üzrə Dövlət Komissiyası, eləcə də, Azərbaycandan ölkənin mal və xidmətlər bazarına daha liberal şərtlərlə daxil olmaları üçün təqdimat gözləyən ÜTT-nın üzvü olan ölkələrin qarşılıqlı təkliflərini işləyib hazırlyıb.
Respublika 9 il ərzində ÜTT-na üzv olmaq üçün hazırlıq işləri aparsa da, yalnız 2005-ci ildə həlledici mərhələyə - ölkələrlə ikitərəfli danışıqlara daxil ola bilib. Hökumət qarşısında qanunvericiliyini təkmilləşdirilməsi üzrə tədbirlərin gücləndirilməsi və ikitərəfli danışıqların intensivləşdirilməsi kimi iki əsas məsələ qoyub.
