Milli Məclisin iqtisadi siyasət daimi komissiyasının sədri akademik Ziyad Səmədzadə bildirib ki, Gömrük Məcəlləsinin qəbuluna ehtiyac var. Bu barədə Trend ə Milli Məclisin mətbuat xidmətindən bildiriblər.
O da qeyd olunub ki, Gömrük Məcəlləsinin qəbulunun zəruriliyi adıçəkilən komissiya üzvləri ilə Gömrük Xidmətinin Təkmilləşdirilməsi üzrə işçi qrupu təmsilçilərinin görüşündə səsləndirilib.
Daimi komissiyanın sədri Ziyad Səmədzadə Azərbaycanda aparılan iqtisadi islahatlar barədə qonaqlara ətraflı məlumat verib. Son 15 ildə ölkəmizdə vergi, bank, gömrük, maliyyə sisteminin tamamilə yenidən işləndiyini bildirib. Ölkəmizin inkişafının gələcəkdə də yüksələn xətlə inkişaf edəcəyinə əminliyini bildirib. Ziyad Səmədzadə hazırda Azərbaycanın gömrük sisteminnin müasir tələblərə uyğun olduğunu söyləyib. Bununla yanaşı əlavə edib ki, bu sahə üzrə mövcud qanunvericilik bazasının daha da təkmilləşdirilməsi üçün yeni Gömrük Məcəlləsinin qəbuluna ehtiyac var.
İşçi qrupunun baş məsləhətçisi Kolin Strinqer Azərbaycanın iqtisadi yüksəlişindən məmnunluğunu diqqətə çatdırıb. Onun fikrincə, ölkəmizin gömrük qanunvericiliyinin təkmilləşdirilməsi iqtisadi inkişaf yolunda daha böyük nailiyyətlərin təməlini qoyacaq.
Ziyad Səmədzadə irəli sürülən bütün təkliflərin diqqətlə öyrənildiyini və yeni Gömrük Məcəlləsinin qəbulu zamanı bütün səmərəli təkliflərin nəzərə alınacağını bildirib.
