Azərbaycan,Bakı/müxbir Trend S.Babayeva/Aprelin 1-nə olan məlumata əsasən, Azərbaycanda yaz əkini 98,2 min hektar sahədə həyata keçirilib. Bu da 2006-cı ilin analoji dövründən 1,6 faiz azdır. Dövlət Statistika Komitəsinin məlumatına əsasən, sahənin azalmasının əsas səbəbi əlverişsiz hava şəraitidir. Bu səbəbdən həmçinin taxıl bitkilərinin sahəsi 4,8 faiz və ya 351 ha azalaraq 7 min ha. təşkil edib.
Buğda əkini sahəsi 9,1 dəfə artıb. Qarğıdalı əkini sahəsi 31 faiz azalaraq 1,4 min ha. təşkil edib. Kartof əkini sahəsi 33,8 min ha (-3,9 faiz), tərəvəz - 19,9 min (-5,6 faiz), bağça bitkiləri sahəsi 2,3 min ha. (-17,6 faiz) təşkil edib.
Əlverişsiz hava şəraiti səbəbindən pambıq əkinini yalnız 10 ha sahədə həyata keçirmək mümkün olub. Analoji vəziyyət həmçinin çuğundur əkinində də müşahidə olunub. Çuğundurun əkin sahəsi 2006-cı ilin analoji dövrü ilə müqayisədə iki dəfə azalıb və 485 ha. təşkil edib.
Üç ay ərzində ət, süd və yumurta istehsalının artımı müşahidə olunub. Ət istehsalının çəkisi 69,2 min ton (+7,6 faiz), süd 302,5 min ton (+2,6 faiz) və 210,8 mln. ədəd yumurta (+3,5 faiz) təşkil edib.
