Azərbaycan, Bakı/ Trend müxbir İ.Xəlilova/ Aprelin 30-dan etibarən Bakı Biznes Mərkəzində İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti və "Allianz group" şirkəti tərəfindən təşkil olunan satıcılar və kassir-nəzarətçilər üçün ikigünlük birgə təlim kursları başlayıb.
Tədbirin açılışında Dövlət Xidmətinin rəisi Xaliq Məmmədov ölkəmizdə ilk dəfə olaraq bu cür kursların təşkil olunduğunu və bu tədbirlərin davamlı olaraq keçiriləcəyini bildirib.
Onun sözlərinə görə, istehlakçı hüquqlarının qorunması, ticarət obyektlərinin uğurlu fəaliyyətində satıcılar və kassir-nəzarətçilər həlledici rol oynayır. Bu səbəbdən də hər bir obyekt sahibi onların təlimləndirilməsində və peşəkarlıq səviyyələrinin artırılmasında maraqlı olmalıdır.
"Allianz group" şirkətinin direktoru Ülvi Ağayev kursun proqramı barədə məlumat verərək onun satıcılar üçün əhəmiyyətindən danışıb. Təlim kurslarının proqramında bu gün xüsusilə aktual olan satıcı etikası, müştərinin qəbulu, onun məmnuniyyətinin təmin edilməsi yolları, satış yerinin təşkili, obyektdə sanitariya qaydaları, mükəmməl satıcının malik olduğu xüsusiyyətlər, malların düzülüşü, onların təqdim olunması, malların qaytarılması və ya dəyişdirilməsi üsulları, kassa aparatının işə hazırlanması və işlədilməsi qaydaları və s. məsələlər öz əksini tapıb.
Kurslarun dinləyicilərinə müvafiq sertifikatlar təqdim olunacaq.
İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti prezidentin 2006-cı il 28 dekabr tarixli Fərmanı ilə yaradılıb.
