Azərbaycan, Bakı /müx. Trend İ.Xəlilova / Azərbaycanın Torpaq və Xəritəçəkmə üzrə Dövlət Komitəsinin sədri Qərib Məmmədovun verdiyi məlumata görə, dövlət komitəsi torpağın kadastrının tərtib olunmasında və aero-foto çəkilişlərin aparılmasında Türkiyənin Xəritəçilik üzrə Baş İdarəsini etibarlı tərəfdaş seçib. Bu tədbirlər artıq imzalanmış müqavilə çərçivəsində həyata keçiriləcək.
"Dövlət sirri məsələlərini nəzərə alaraq Türkiyə tərəfi bütün respublika üzrə kadastrın hazırlanmasında yeganə etibarlı tərəfdaş seçilib. Aero-foto çəkilişlər ixtisaslaşmış vertolyotların köməyliyi ilə həyata keçiriləcək. Biz belə vertolyotlara malik deyilik, bu səbəbdən də Türkiyə şirkətləri ilə belə təchizatı əldə etmək məqsədilə müqavilə imzalanıb. Biz kosmik görüntüləri əldə etdikdən sonra onları yerüstü nəzarət məntəqələri vasitəsilə dəqiqləşdirəcəyik" - deyə Məmmədov bildirib.
Kadastrın hazırlanması Azərbaycanda daşınmaz əmlakın qeydiyyatı üzrə Dünya Bankının layihəsi üzrə həyata keçiriləcək. Layihənin dəyəri 38,57 mln. dollar təşkil edir və bu məbləğin 30 mln. dolları Dünya Bankının kreditinin payına düşür.
Məmmədovun sözlərinə görə, layihənin 13 mln. dolları Dövlət Komitəsinin tədbirlərinin reallaşması məqsədilə ayrılacaq, bu tədbirlərə torpaq kadastrının, aeroşəkillərin, xəritənin hazırlanması aiddir. Bir-iki il ərzində naviqasiya sisteminin yaradılması planlaşdırılır.
Layihə bütün Azərbaycan ərazisini əhatə edəcək, reallaşmasının sonuna qədər daşınmaz əmlakın yerləşdiyi yer və ona olan hüquq vahid avtomatlaşdırılmış sistemə daxil ediləcək.
