Azərbaycan, Bakı, 20 fevral / " , müxbir V.Şərifov/ Hindistanın "ONGC Videsh Ltd." şirkəti perspektivli "Naxçıvan" dəniz strukturunun işlənmə layihəsi üzrə geoloji-axtarış zərfini əldə edib. Bu barədə çərşənbə günü Azərbaycan Dövlət Neft Şirkətindən (ARDNŞ) məlumat verilib.
"Şirkətin bu sənədlərlə tanış olmasından sonra müqavilənin bağlanma mümkünlüyü barədə gələcək danışıqlar məsələsinə baxılacaq" - deyə ARDNŞ-dan bildiriblər.
"ONGC" Azərbaycanın həm quru, həm də dəniz sahələrindəki digər layihələrlə də maraqlanır və çox güman ki, onlardan birində iştirak edəcək.
Əvvəllər "Naxçıvan" yatağını xarici şirkət işlədib və kifayət qədər karbohidrogen həcmi aşkar etməyib. "Naxçıvan"nın işlənməsi üzrə müqavilə 1997-ci il avqustun 1-də imzalanıb. Layihənin iştirakçıları 50 faiz pay ilə "ExxonMobil", 50 faiz pay ilə ARDNŞ olub.
"ONGC Videsh Ltd." dövlət şirkəti ölkədə enerji daşıyıcıları hasilatının 80 faizinə nəzarət edir. Həmçinin "ONGC Videsh Ltd." 15 ölkədə fəaliyyət göstərir və qazıma, istismar, o cümlədən emal ilə məşğul olur. Ötən əsrin 50-ci illərində bu şirkətin yaranması və formalaşmasında Azərbaycanın neft mütəxəssisləri xüsusi rol oynayıb. Hindistan şirkəti həmçinin Azərbaycanın neftemalı müəssisələrinin müasir texnologiyalardan istifadə olunmaqla yenidən qurulması üzrə iştirakda marqlıdır və bu layihəyə investisiya yatırmaq niyyətindədir.
