Azərbaycan, Bakı, 05 iyun/ Trend , müxbir S.Əliyev/ Türkiyə "Şahdəniz" yatağının işlənilməsinin ikinci mərhələsi çərçivəsində, Azərbaycanda almaq niyyətində olduğu qazın həcmi üzrə təkliflər irəli sürüb. Lakin, Azərbaycan Dövlət Neft Şirkətinin yüksək vəzifəli nümayəndəsi cümə axşamı bildirib ki, "bütün təkliflər konsorsiumun [yatağı işləyən] tərəfdaşları üçün məqbuldur".
"Bizim "Şahdəniz"in ikinci mərhələsi çərçivəsində, Türkiyəyə verə biləcəyimiz həcmlər "Şahdəniz"in birinci mərhələsinə görə qazın qiymətindən asılıdır. Azərbaycan qazının qiyməti nə qədər yüksək olsa, biz bu və ya digər tərəfə o qədər çox həcmdə qaz təklif edə biləcəyik", - şirkət nümayəndəsi bildirib.
Hazırda Türkiyə və Azerbaijan gas supply company ("Şahdəniz" qazının satışı ilə məşğul olur) yatağın işlənilməsinin birinci mərəhələsi çərçivəsində, bu ölkəyə tədarük olunan qazın dəyərinin artırılmasına dair danışıqlar aparırlar. 2008-ci il aprelin 15-də "Şahdəniz" yatağından hasil edilən Azərbaycan qazının Türkiyəyə hər min kubmetrinə görə $70-$120 civarında satıldığı müddət bitib. Türkiyə üçün qazın qiymətinin dəyişdirilməsinə dair qərar qəbul edildikdən sonra, yanacaq Türkiyə tərəfindən yeni qiymətlə alınacaq. Bu zaman qazın dəyəri maksimal dərəcədə artırılacaq. "Qiymət hər 1 min kubmetrinə görə $300-dən də çox ola bilər", - ARDNŞ nümayəndəsi bildirib.
"Şahdəniz" dəniz yatağının işlənilməsinə dair müqavilə 1996-cı il iyunun 4-də imzalanıb. Layihənin iştirakçıları: BP (texniki operator) - 25,5 faiz, Statoil Hydro (kommersiya operatoru) - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.
Bu yataqdan qaz hasilatı 2006-cı ilin dekabrında başlayıb. Qaz Cənubi Qafqaz qaz kəməri ilə Gürcüstan və Türkiyəyə nəql olunur. Azərbaycanda qazın alıcısı kimi də çıxış edir. Birinci mərhələdə hasilatın zirvəsində yataqdan 8,6 mlrd. kubmetr qaz hasil ediləcək. Türkiyə bunun 6,6 mlrd. kubmetrini müqavilə ilə öhdəsinə götürüb.
Müəlliflə əlaqə saxlamaq üçün elektron ünvan: [email protected]