Azərbaycan, Bakı, 16 sentyabr / Trend , müxbir E.İsmayılov /
2015-2016-cı ilə "Ağ axın" qaz kəməri (White Stream) Avropanın qazla təmin edilməsində hazırda mövcud olan boşluqların bir hissəsini dolduracaq, çərşənbə günü Bakıda beynəlxalq konfransda Britaniyanın White stream Pipeline Company şirkətinin direktoru Roberto Pirani deyib.
"Nabukko" və "Ağ axın" qaz kəməri layihələri bir-birinə rəqib deyillər. "Nabukko" və "Ağ axın" bir-birini tamamlayacaq və hövbəti boru kəmərlərinin inşası üçün stimul verəcək", - Pirani deyib.
Onun sözlərinə görə, boru kəmərləri Xəzər regionuna investisiya cəlb etmək üçün stimuldur. Onlar (investisiyalar) yalnız Avropaya çıxış zəmanəti olarsa,təqdim olunacaq.
Piraninin qeyd etdiyinə görə, Azərbaycanda qaz ildə 8 milyard kubmetr qaz tədarükünü nəzərdə tutan "Ağ axın" layihəsinin birinci fazasının realizəsi üçün kifayət qədərdir. "Ağ axın" layihəsinin birinci fazasının realizəsi dörd milyard dollar həcmində investisiya nəzərdə tutur.
"Avropa İttifaqından dəstək alan "Cənub qaz dəhlizi" yalnız "Nabukko" qaz kəmərinə daxil edilməməlidir. O, həm də "Ağ axın" və İTGİ qaz kəmərlərini nəzərdə tutur. Bu qaz kəmərlərinin əsas məqsədi 2020-ci ilə Avropanın 60 milyard kubmetr həcmində qaz tələbatının təmin edilməsidir", - Pirani deyib.
Onun sözlərinə görə, qaz kəmərləri layihələrinə yalnız kommersiya tərəfdən baxılmalıdır. Onlara siyasi rakursda baxmaq lazım deyil. "Biz Ukrayna ilə Rusiya arasında baş verən vəziyyəti təkrarlamaq istəmirik", - Pirani deyib.
İlk növbədə "Nabukko" layihəsi, gələcəkdə isə artıq "Ağ axın" da reallaşdırılacaq. "Nabukko" aparıcı arteriyadır, biz isə ("Ağ axın") "Nabukko"nun ardınca gələn arteriya olacağıq", - Pirani deyib.
"Ağ axın" layihəsinə əsasən, Azərbaycanın "Şah Dəniz" yatağından qazın Gürcüstan ərazisindən keçməklə Qara dənizin dibi ilə Ukraynaya və Aİ ölkələrinə tədarük edilməsi planlaşdırılır. Layihəni hazırlayanların konsepsiyasına əsasən, boru kəməri Tbilisi yaxınlığında yerləşən və təxminən 100 km uzunluğunda olan, Gürcüstan ərazisindən Qara dənizinə yönələn Cənubi Qafqaz qaz kəmərinə birləşəcək. Oradan təxminən 650 km dənizin dibi ilə Krıma çatdırılmalı, sonra Feodosiyadan Ukraynanın tranzit sisteminə qoşulmalıdır. Alternativ plan boru kəmərinin Rumıniyaya qədər uzadılmasını nəzərdə tutur.
Birinci mərhələdə boru kəmərinin başlanğıc buraxılış gücü illik 8 milyard kub metrqaz səviyyəsində nəzərdə tutulub. Bu təqdirdə qaz kəməri Azərbaycanın "Şah Dəniz" yatağında qazla təchiz ediləcək. Daha sonra "Ağ axın" Transxəzər qaz kəmərinə qoşula bilər. Bu halda boru kəmərinin ikinci xətti dənizin dibi ilə çəkiləcək və gücü ildə 24-32 milyard kubmetr qazadək artırılacaq.
Məqalə müəllifi ilə əlaqə ünvanı: [email protected]