Azərbaycan, Bakı, 13 iyul /Trend/
ARDNŞ-in "Neft Daşları" Neft-Qazçıxarma İdarəsinin yataqlarından aztəzyiqli ötəri qazların yığılması və nəqli üzrə layihənin həyata keçirilməsi 5,3 milyon manat dəyərində qiymətləndirilir. Bu barədə ARDNŞ-in Ekologiya İdarəsinin məlumatında deyilir.
"Təmiz inkişaf mexanizmi" layihəsi çərçivəsində həyata keçirilən bu layihənin reallaşdırılması ildə 203,6 milyon kubmetrə yaxın qaz almağa imkan verəcək.
Layihənin reallaşdırılması çərçivəsində ARDNŞ və Almaniyanın "Gazprom Germania GmbH" şirkəti arasında saziş bağlanıb. Hazırda kompressor və boru kəmərlərində montaj-tikinti işlərinin 80 faizi başa çatıb.
Görülən işlərin yoxlanılması məqsədilə iyulun 19-dan 23-dək BMT-nin "Təmiz inkişaf mexanizmi" layihəsi üzrə İcra Şurasının və "Gazprom Germania GmbH" Şirkətinin nümayəndələri Bakıda olacaqlar.
