Azərbaycan, Bakı, 10 yanvar /Trend, müxbir A.Axundov/
ARDNŞ İstanbulun paylayıcı qaz şəbəkəsinin sahibi İGDAŞ-ın (İstanbul Gaz Dağıtım Sanayi ve Ticaret Anonim Şirketi) səhmlərinin 90 faizini əldə edə bilər. Bu barədə Trend-ə şirkətdəki mənbə deyib. 2010-cu ilin sonuna İGDAŞ-ın abonentlərinin sayı 4,435 milyon nəfər təşkil edib. Şirkətin illik satış həcmi 4 milyard kubmetrə yaxın qaz təşkil edir.
İGDAŞ-dakı mənbənin məlumatına görə, ARDNŞ şirkətin özəlləşdirilməsi üzrə tenderdə iştirak edə bilər.
"Apreldə şirkətimizin paket satışı üsulu ilə özəlləşdirməsi prosesinə başlanılacaq. Bu zaman ARDNŞ bizə müraciət edə bilər. Yaxın vaxtlarda tenderin şərtləri şirkətimizdə pay sahibi olmaqda maraqlı olan şirkətlərə elan ediləcək", - o deyib.
"Qanunvericiliyə əsasən, qazın paylandığı şəhər bələdiyyəsi paylayıcı qaz şirkətinin səhmlərinin 10 faizinə sahibdir və daha 10 faiz almağa hüququ var. Bu o deməkdir ki, qalmış 80-90 faizi hər hansı bir şirkət ala bilər", - mənbə qeyd edib.
Onun sözlərinə görə, ARDNŞ-nin yüksəkvəzifəli nümayəndələrinin şirkətin İGDAŞ-ın alınması ilə bağlı bəyanatlarına baxmayaraq, Azərbaycan Dövlət Neft Şirkətindən hələ ki rəsmi müraciət daxil olmayıb.
Daha əvvəl ARDNŞ-nin yüksəkvəzifəli nümayəndəsinin dediyi kimi, şirkət Türkiyədə paylayıcı qaz şirkətini almağı planlaşdırır.
"ARDNŞ İstanbul və Ankaranın paylayıcı qaz sisteminə daxil olmağı, İGDAŞ və "Başkentgaz" şirkətlərinin tərəfdaşı olmağı, ayrıca paylayıcı qaz şirkəti almağı planlaşdırır", - şirkət nümayəndəsi bildirib.
"Azərbaycan Dövlət Neft Şirkəti İstanbulun qazpaylayıcı İGDAŞ şirkəti və Ankaradakı "Başkent Doğalgaz" şirkəti ilə fəal surətdə maraqlanır", - o əlavə edib.
Mənbənin sözlərinə görə, ARDNŞ İGDAŞ-da pay sahibi olarsa, yalnız qazın paylanması ilə məşğul ola biləcək.
"Qanunvericilik çərçivəsində fəaliyyət sahələri aydın şəkildə bölüşdürülüb. Yəni qazın hasilatı, pərakəndə satışı, paylanması, saxlanması, sıxılması və nəqli ilə məşğul olan şirkətlər var. Bizim şirkətimiz qaz paylayıcı şirkətdir və biz özümüz qazı idxal edə bilmirik. Əgər ARDNŞ İGDAŞ-da pay sahibi olsa, öz qazını idxal etmək üçün əlavə şirkət yaratmalı və Türkiyə enerji bazarının nizamlayıcısı (EPDK) dövlət orqanına öz qazının idxalı üçün lisenziyanın alınması ilə bağlı müraciət etməli olacaq", - mənbə vurğulayıb.
Daha əvvəl SOCAR-TURCAS-ın birgə neft-kimya şirkəti Türkiyənin daxili bazarında qazın topdan satışı ilə bağlı lisenziya alıb.
Lisenziya Türkiyənin enerji bazarının nizamlama qrupu tərəfindən 30 il müddətinə verilib.
Bundan əvvəl Türkiyə ilə ildə 1,2 milyard kubmetr həcmində alış və sonradan satış üzrə razılıq əldə olunub. Qazın böyük hissəsi ARDNŞ-nin pay hissələrinin olduğu "Petkim" neft-kimya kompleksinə, qalan hissəsi isə Türkiyənin daxili bazarında alıcılara çatdırılacaq.
Azərbaycan Sənaye və Energetika Nazirliyi və Türkiyə Energetika və Mineral Resurslar Nazirliyi arasında imzalanmış Anlaşma Memorandumuna əsasən, Türkiyənin törəmə şirkəti hər il BOTAŞ-dan "Şahdəniz" qaz-kondensat yatağının işlənib hazırlanmasının birinci mərhələsi çərçivəsində Türkiyə üçün nəzərdə tutulmuş 6,6 milyard kubmetr qazın 1,2 milyardını alacaq. Qaz 2016-cı ilin sonuna qədər BOTAŞ tərəfindən ARDNŞ üçün nəql ounacaq.
1,2 milyard kubmetr həcmində qazın qiyməti idxal olunmuş qazın dəyəri, ölkə daxilində nəql üçün xərclər və digər vergi rüsumlarına ayrılacaq.
Göstərilmiş həcmin çatdırılması üzrə ticari şərtlər "al və ödə" müqaviləsi əsasında ARDNŞ və BOTAŞ şirkətləri arasında razılaşdırılacaq.
