Azərbaycan, Bakı, 19 aprel /Trend, müxbir A.Axundov/
Dünyada neftin qiymətlərinin artması ilə əlaqədar 2011-ci ilin birinci rübündə Azərbaycan Respublikası Dövlət Neft Fondunun (ARDNF) əlavə gəlirləri 1,505 milyard dollar təşkil edib. Trend-in məlumatına görə, bu barədə ARDNF-in icraçı direktoru Şahmar Mövsümov çərşənbə axşamı strukturun ilin birinci rübündə fəaliyyətinin yekunlarına həsr olunmuş mətbuat konfransında bildirib.
"Birinci rübdə dünyada neftin orta qiyməti 95 dolları ötüb, Azərbaycanın dövlət büdcəsində isə neftin qiyməti 60 dollar məbləğində müəyyən edilib , - Mövsümov bildirib. - ARDNF-ə yanvar-mart ərzində 43 milyon barel neftin satışından vəsait daxil olub, neftin 35 dollar həcmində qiyməti ilə fərq üzrə fondun əlavə gəlirləri 1,505 milyard dollar təşkil edib".
Onun sözlərinə görə, əgər 2011-ci il ərzində neftin qiymətində əsaslı dəyişiklik olmasa, onda 2011-ci ilin sonunda ARDNF-in aktivləri 30 milyard dolları ötəcək.
2011-ci il aprelin 1-nə olan vəziyyətə görə, ARDNF-nin aktivləri bu ilin əvvəli ilə müqayisədə 13,3 faiz (22 766,8 milyon dollar) artaraq, 25 796,9 milyon dollar təşkil edib.
Dövlət Neft Fondu 1999-cu ildə yaradılıb və həmin vaxt onun aktivləri 271 milyon dollar təşkil edib.
ARDNF-nin Nizamnaməsinə görə, fondun vəsaitləri strateji baxımdan mühüm infrastruktur obyektlərin tikintisi və yenidənqurulmasına, eləcə də vacib ümummili problemlərin həlli üçün istifadə oluna bilər. 2001-2009-cu illərdə əsas diqqət həm neft sektorunun, həm də ölkədəki infrastruktur sahələrin və qeyri-neft sektorunun inkişafına yönəldilib. Hazırda fondun vəsaitləri hesabına irriqasiya, nəqliyyat sahələrində bir sıra mühüm layihələr maliyyələşdirilir.
Dövlət Neft Fondunun əsas məqsədləri bunlardır: iqtisadiyyata mənfi təsirlərin minimallaşdırılması məqsədilə fondun vəsait və aktivlərini xaricdə yerləşdirməklə müəyyən dərəcədə "holland sindromu"nun qarşısını almaq, vəsaitlərin gələcək nəsillər üçün toplanmasını təmin etmək və ölkədə cari sosial-iqtisadi prosesləri dəstəkləmək.
