Azərbaycan, Bakı, 13 sentyabr /Trend, müxbir E.İsmayılov/
Xəzər dənizinin Azərbaycan hissəsində yerləşən "Azəri-Çıraq-Günəşli" neft-qaz yataqları blokunda qazın dərin emalı prosesi Rist-Service Contract formasında möhkəmləndiriləcək. Bu barədə çərşənbə axşamı Trend-ə ARDNŞ-nin yüksəkvəzifəli nümayəndəsi bildirib.
"Bu, xarici şirkətlərlə neft-qaz layihələri çərçivəsində əməkdaşlığın yeni forması olacaq", - mənbə deyib.
Onun sözlərinə görə, hazırda qazın dərin emalı üzrə layihə çərçivəsində işlər davam edir.
Mənbə bildirib ki, "Azəri-Çıraq-Günəşli" blokunun işlənməsi üzrə ARDNŞ tərəfdaşları yeni müqavilənin iştirakçısı ola bilərlər. Yeni müqavilənin hazırlıq işlərinin ilin sonunadək tamamlanması gözlənilir.
Müqavilənin hazırlanması ona görə zaman tələb edir ki, sənəd üçüncü tərəf - hüquqi şirkət tərəfindən təqdim olunmuş sxemlər üzrə hazırlanacaq.
Bundan əvvəl ARDNŞ-nin geologiya, geofizika və yataqların istismarı üzrə birinci vitse-prezidenti Xoşbəxt Yusifzadənin dediyi kimi, AÇG blokunda qazın dərin emalı konsepsiyası çərçivəsində yeni platformanın tikintisi təklif olunur ki, o, Səngəçal neft terminalı ilə birbaşa sualtı qaz boru kəməri ilə bağlansın.
Yeni platforma "Günəşli və "Çıraq" yataqlarının dərin sulu hissəsində istismar olunan iki platforma arasında yerləşəcək. Qazın dərin emalı layihəsində işlərin ilk növbədə bu iki yataqda, sonra isə "Azəri" yatağında aparılması planlaşdırılır.
Yeni platformadan 18 istismar quyusunun qazılması planlaşdırılır.
Yusifzadənin sözlərinə görə, bu layihə üzrə qazın çıxarılmasına 2017-ci ildə başlanacaq. Layihənin operatoru BP ola bilər.
Qazın dərin emalı həcminin təxminən 200-250 milyard kubmetr olduğu gözlənilir.
"Azəri-Çıraq-Günəşli" yataqlar blokunda hasilatın pay bölgüsü haqqında saziş 1994-cü ildə imzalanıb. Layihənin iştirakçıları aşağıdakılardır: BP (operator - 35,83 faiz iştirak payı), "Chevron" (11,27 faiz), AzACG (11,6 faiz), INPEX (10,96 faiz), "Statoil" (8,56 faiz), "Exxon" (8 faiz), TPAO (6,75 faiz), "Itochu" (4,3 faiz), "Hess" (2,72 faiz).
