Azərbaycan, Bakı, 21 oktyabr /Trend, müxbir E.İsmayılov/
ABŞ-ın MI-LLC şirkəti tərəfindən Dövlət Neft Şirkətinin tullantıların idarə olunması mərkəzinin yenidən qurulması üzrə texniki iqtisadi əsaslandırma (TİƏ) sənədi hazırlanaraq ARDNŞ-yə təqdim edilib. Trend-in məlumatına görə, bu barədə cümə günü ARDNŞ-in Ekologiya İdarəsinin rəsmi saytında yerləşdirilən məlumatda deyilir.
Gələcəkdə layihə üzrə ARDNŞ-də tullantıların idarə olunması sisteminin təkmilləşdirilməsi və bu sahədə müasir texnoloji proseslərin tətbiq edilməsi nəzərdə tutulur.
ARDNŞ-nin ekoloji məsələlər üzrə vitse-prezidenti Rafiq Hüseynzadənin əvvəllər dediyi kimi, şlamın basdırılması üçün poliqon 1985-ci ildə işləməyə başlayıb və hazırda müasir ekoloji tələblərə cavab vermir. Məhz bu məqsədlə onun yenidən qurulması qərara alınıb.
Yeni mərkəz neft şlamının emalına və təxminən 62 bərk məişət və sənaye tullantı növünə şamil ediləcək.
MI-LLC şirkəti ilə ARDNŞ arasında tullantıların idarə olunması mərkəzinin yenidən qurulması üzrə TİƏ sənədinin hazırlanması barədə müqavilə ötən il mayın 20-də imzalanıb. TİƏ hazırlanması çərçivəsində ARDNŞ müəssisələrinin fəaliyyəti nəticəsində yaranan tullantıların həcmindən asılı olaraq müvafiq emal texnologiyalarının seçiminə də baxılıb.
İşlər ARDNŞ ilə ABŞ-ın Ticarət və İnkişaf Agentliyi (USTDA) arasında imzalanan 572 min dollar həcmində qrant sazişi çərçivəsində həyata keçirilir. Saziş ötən il avqustun 13 -də imzalanıb.
