Azərbaycan, Bakı, 8 may /Trend, müxbir E.İsmayılov/
Azərbaycanın "Azəri-Çıraq-Günəşli" (AÇG) dəniz neft-qaz yataqları blokunun işlənməsinə başlanandan 333,6 milyon ton neft və 95,5 milyard kubmetr qaz hasil edilib.
Trend-in məlumatına görə, bu barədə Azərbaycan Respublikası Dövlət Neft Şirkətinin (ARDNŞ) I vitse-prezidenti Xoşbəxt Yusifzadənin "Respublika" qəzetində dərc edilən məqaləsində deyilir.
Hazırda AÇG-nin dərinsulu hissəsində 77 hasilat quyusundan ayda orta hesabla 2,8 milyon ton qədər neft və 1,1 milyard kubmetr qaz hasil olunur.
2014-cü il mayın 1-dək dünya bazarlarında Azərbaycanın payına düşən 177,2 milyon tona qədər mənfəət nefti satılıb. Neft AÇG blokunun işlənməsi çərçivəsində əldə olunub.
Məqalədə deyilir ki, mənfəət neftinin həcmi ilbəil artır: "Təkcə 2013-cü ildə "Azəri-Çıraq-Günəşli" blokundan hasil edilmiş 32,7 milyon ton neftin 22,5 milyon tonu, yəni 68,8 faizi Azərbaycanın payına düşən mənfəət nefti olub".
