Azərbaycan, Bakı, 07 aprel/ Trend , müxbir S.Babayeva/ Yayda Rotterdam məhkəməsi Maltanın FIMbank-ı və Azərbaycan hökuməti arasında maliyyə məhkəmə çəkişməsi ilə bağlı qərarı elan edə bilər. Azərbaycan hökumətinin müdafiəsi Rabitə və İnformasiya Texnologiyaları Nazirliyinə tapşırılıb.
Bazar ertəsi nazirlikdən bildiriblər ki, məhkəmə əvvəllər qərarın noyabrın 20-də mümkün qəbul edilməsini elan edib. Lakin Rabitə Nazirliyinə məhkəmə tərəfindən işə baxılması üçün əlavə vaxtın lazım olduğu haqqında rəsmi məktub gəlib. Məhkəmənin iyunda qərar qəbul edəcəyi gözlənilir.
Rabitə Nazirliyində hesab edirlər ki, iki ssenari mümkündür - məhkəmə işin mahiyyətinə görə qərar qəbul edə bilər və ya yekun qərarın qəbul edilməsi üçün əlavə faktlar və ifadələr cəlb edə bilər. Bu və ya digər halda iş yenidən uzana bilər.
Sonuncu dinləmələr oktyabrın 9-da baş tutub və əgər bank əlavə şahidin çağırılması haqqında xahişlə çıxış etməsəydi, həmin gün yekun iclas keçirilə bilərdi.
Maltanın FimBank-ı (First International Merchant Bank Ltd.) ümumi məbləği $4,5 mln.-dan çox olan kreditin ödənilməsi tələbi ilə Azərbaycan hökumətinə qarşı iddia qaldırıb. Bank bu kreditin dövlət zəmanəti altında Azərbaycanın iki telekommunikasiya şirkətinə verildiyini idda edir. FIMbank-ın birinci iddiası 2004-cü ilin iyulunda Rotterdam və Paris məhkəmələrinə verilib.
