Azərbaycan, Bakı, 2 oktyabr /Trend, müxbir H.Vəliyev/
"Azericard" prosessinq mərkəzi öz şəbəkəsində xidmət göstərən bankomat menyusu interfeysinin yenilənməsi üzrə işləri tamamlayıb. Bu barədə Trend-ə "Azericard" prosessinq mərkəzinin biznesin inkişafı üzrə rəhbəri Cahangir Məmmədov deyib.
Onun sözlərinə görə, menyuda plastik kartların təkrar daxil edilməsini tələb etməyən təkrar əməliyyatlar aparmağa imkan verən yeni seçim yaradılıb. Lakin bunu etmək üçün təkrar olaraq avtorizasiyadan keçmək lazımdır.
"Yeni interfeysin üstün cəhətlərindən biri də odur ki, mobil rabitə, televiziya xidməti ödənişi, kommunal ödəmələr və s. bölmələrə ayrılıb", - Məmmədov bildirib.
Yeni menyu Azərbaycan Beynəlxalq Bankı, Bank Standart və Xalq Bankın bankomatlarında var. Hazırda "Azericard" şəbəkəsində xidmət göstərən bütün bankomatlarda yeni menyunun qurulması üzrə işlər aparılır.
