Azərbaycan, Bakı, 9 dekabr /Trend, müxbir H.Vəliyev/
Azərbaycanın "Smart Systems Technology" şirkəti "Evə optika" layihəsini həyata keçirməyə başlayır. Bu barədə bazar ertəsi Trend-ə şirkətin baş direktoru Sübhan Qaragözov deyib.
Onun sözlərinə görə, şirkətin əsas resursları bu layihəyə yönəlib: "Layihəni əsasən Bakının əhalisi sıx olan rayonlarında və Azərbaycanın rayon mərkəzlərində həyata keçirmək planlaşdırılır".
İşlər gələn il yanvarda start götürəcək genişzolaqlı internetin inkişafı layihəsi çərçivəsində aparılacaq. Şirkətin optik şəbəkəsini genişləndirmək üçün tədarükçü qismində Çinin "Huawei Technologies" şirkəti seçilib.
S.Qaragözov qeyd edib ki, internet-provayderlərin biznesi üçün daha rentabelli hələ də paytaxt bazarı və respublikanın rayon mərkəzləridir: "Problem ondadır ki, biz hələ kəndlərə çıxış əldə edə bilmirik ki, bu da, əlbəttə, əlavə sərmayə tələb edir. Buna baxmayaraq, rayon mərkəzlərində biznesin rentabelliyi kənd yerlərində biznesin irəliləməsinə təsir edəcək. Şəbəkəmiz hazırda 8 rayon mərkəzini əhatə edir və biz bunu gələcəkdə genişləndirməyi planlaşdırırıq. Şəbəkənin genişləndirilməsi üçün avadanlıq artıq sifariş edilib".
Şirkətin baş direktorunun sözlərinə görə, ADSL-in hər il öz mövqelərini itirməsinə baxmayaraq, bu çıxış metodu respublikanın qəsəbə və kəndlərində üstünlük təşkil edəcək: "Çünki optik rabitə xətlərinin bu yaşayış massivlərinə çatdırılması hələ rentabelli deyil".
O vurğulayıb ki, Azərbaycanın rayonlarında ADSL qoşulmalarının sayı daim artır: "Lakin əfsus ki, hələ müəyyən boşluqlar mövcuddur. Həmin boşluqlar regional istifadəçinin seçiminin olmamasından ibarətdir. Söhbət Bakıdan kənarda məhdud sayda internet-provayderlərdən gedir. Yəni, paytaxt istehlakçılarından fərqli olaraq, rayonlardakı istehlakçıların internet xidmətləri tədarükçüsü ilə bağlı geniş seçimi yoxdur".
